Dámi til úıirgen taǵam daıyndaý úshin de shynaıy sheberlik qajet. Saıysqa qatysýshylardyń aıtýlaryna qaraǵanda, top jarý ońaı bolmasa kerek. Álemniń otyz memleketinen 250-den astam aıtýly aspazdar jınalǵan. Biriniń dáminen biriniki tátti. Bezendirilýi de ásem. Eń kirpııaz, talapshyl talǵam ıesiniń ózin tánti etkendeı. Aldymen, ózbek halqynyń ejelden maqtaýly ashanasymen tanysypty. San ǵasyrlyq tájirıbesi bar ózbek aspazdary shyǵys halqynyń álemge áıgili taǵam túrlerin daıyndaýdyń ózderi ábden meńgergen qyr-syryn ashqan. Ýaqyttary jetkenshe úıretken, dám tatyrǵan. Sol arqyly ózderiniń qanshalyqty qonaqjaı halyq ekendikterin kórsetken.
Báıge ataýlynyń bárinde mereıińniń ústem bolýy aldymen ózińe baılanysty. Qatysýshylarǵa nebári otyz mınýt ýaqyt berilgen eken. Osy ýaqyttyń ishinde tańǵy as, túski as daıyndap úlgerýiń kerek. Kókshetaýlyq aspazdar ulttyq taǵam túrlerin daıyndaýmen utypty. Irimshik, qurt, súrlengen qazy-qarta, jal-jaıa.
– Biz daıyndaǵan dámdi tatqandar mańaıymyzdan aınalsoqtap kete almaı qaldy, – deıdi oblys ortalyǵyndaǵy №1 kolledjdiń sheberi Irına Ibragımova, – unatqandary sondaı, satasyńdar ma dep qolqalady. Ásirese tútinge az ǵana ustalyp, babymen keptirilgen súr ettiń ıisi qazylar alqasyn ǵana emes, bylaıǵy jurtty da shaqyryp turdy.
Aspazdardyń aıtýyna qaraǵanda, týrızmdi damytýǵa dámi til úıiretin taǵam da dáneker bola alar edi. Árıne álemdegi árli, nárli taǵamnan talǵap dám tatyp júrgenderdi tańyrqatý ońaı emes. Bul oraıda olar úshin qazaqtyń bar dámi baǵaly. Ony osy joly bizdiń aspazdar ańǵaryp qaıtqan. Endigisi qarapaıym qazan qaınatqanǵa qarap qalmaı, ǵasyrlar boıy jalǵasyp kele jatqan ulttyq taǵam daıyndaý ónerin sony bir bıikke shyǵarý.
Aıtpaqshy, Kókshetaýdan barǵan tórt aspaz Qazaqstan aspazdary ulttyq assosıasııasynyń prezıdenti, oblystyq máslıhattyń depýtaty Elena Mashınskaıaǵa alǵystaryn aıtýda. Jeke kásipker baıqaýǵa qatysýshylardyń bar shyǵynyn kótergen. Sol kómeginiń arqasynda tórtkúl dúnıeden jınalǵan as qadirin biletin qaýym qazaq halqynyń dámin tatyp, joǵary baǵasyn beripti. Kókshetaýlyq aspazdar úsh atalym boıynsha kúmis medaldarmen marapattalǵan. Eń bastysy, endigi arada bizden basqa jurt ta qazy-qarta, jal-jaıanyń qadirin bile júredi.
