Onda Úkimettiń elimizdegi áleýmettik qamsyzdandyrýǵa muqtaj turǵyndardyń jaǵdaıyna qatysty atqaryp jatqan jumysy týraly aıtyldy. 2020 jyldan bastap ataýly áleýmettik kómek, eń aldymen, az qamtylǵan otbasylardyń balalaryna beriledi.
Memleket basshysy oblystardaǵy azamattardyń aryz-shaǵymdaryn ádil ári tıimdi qarastyrýǵa erekshe kóńil bólýdi tapsyrdy. Osyǵan baılanysty barlyq deńgeıdegi ákimderdiń jaýapkershiligi aıtarlyqtaı artatyn bolady.
Kezdesý barysynda mindetti medısınalyq saqtandyrý júıesin sapaly júzege asyrý máselesi de qarastyryldy. Úkimetke naqty tapsyrmalar berildi.
Sonymen qatar búgin Qasym-Jomart Toqaevqa Esep komıtetiniń tóraǵasy Natalıa Godýnova Qorǵanys mınıstrligine, «Qazaqstan ınjınırıng» Ulttyq kompanııasy» aksıonerlik qoǵamyna jáne «Qazarnaýlyeksport» respýblıkalyq memlekettik kásipornyna júrgizilgen memlekettik aýdıttiń qorytyndysy týraly baıandady. Esep komıtetiniń tóraǵasy «Qazaqstan ınjınırıng» kompanııasynyń qarjylyq-sharýashylyq jumysyndaǵy retsiz shyǵyndar, qaryz júktemeleriniń artýy, holdıngtegi óndiris júıesiniń ábden eskirgeni jóninde málimet berdi.
Memleket basshysy aýdıt qorytyndysy boıynsha jınaqtalǵan materıaldardy ókiletti organdarǵa joldaýdy, laýazymdy tulǵalardyń jaýapkershiligin qarastyrýdy tapsyrdy.
