Sharýa buǵan deıin de asyl tuqymdy mal satyp alýǵa beriletin sýbsıdııaǵa qol jetkizbegenin aıtyp kelgen edi. Ol týraly gazetke tolyq jazǵan bolatynbyz. Osy 2016 jyldan beri sheshimin tappaı kele jatqan ótemaqy daýy jaqynda ǵana Memleket basshysy Qasym-Jomart Toqaevtyń atyna hat joldaǵannan keıin oblys ákimi Amandyq Batalovtyń qulaǵyna jetipti.
- Oblys ákiminiń qabyldaýyna 3 jylǵa jýyq jazylyp, suranyp júrip, kire almadym. Jaqynda Prezıdenttiń atyna ashyq hat jazǵasyn, qabyldady. Batalov myrzaǵa bolǵan jaǵdaıdy aıttym. Ákim orynbasary Serikjan Beskempirov pen Aýyl sharýashylyǵy basqarmasynyń basshysy Maqsut Japarovqa máseleniń qaıdan shyqqanyn anyqtap, kináli adamdy taýyp, sýbsıdııa tóleýdiń jolyn qarastyrýdy tapsyrdy. Ákim qabyldaýynan keıin taǵy bir kún Taldyqorǵanda qalyp, istiń sońyn kúttim. Biraq tapsyrma alǵan shendiler jaqyn kúnderi nátıjesin habarlaıtynyn aıtyp, shyǵaryp saldy. О́kinishke qaraı, áli naqty jaýap joq. Jyl bolsa aıaqtaldy, demek bıyl da sýbsıdııa tólenbeıtini anyq. Shendiler jaýap bermeı otyr. Amalym taýsylǵasyn «Egemen Qazaqstan» gazetine shaǵymdanýǵa taǵy májbúr boldym, - deıdi «Shúkeıit ata» sharýa qojalyǵynyń jetekshisi Muhtar Aqynov.
Oqyrmanǵa túsinikti bolý úshin oqıǵaǵa taǵy da az-kem toqtala ketsek: jeke sharýa 2015 jyly «Altyn asyq» memlekettik baǵdarlamasyna qujat ótkizip, 6 mln teńge nesıe alady. Bul qarjyǵa 230 bas asyl tuqymdy qoı men qoshqar satyp ákeledi.
- 2015 jyly «Altyn asyq» baǵdarlamasy boıynsha 6 mln teńge nesıe aldym. Baǵdarlama sharty boıynsha tólenetin 14 prosenttiń 10 prosentin memleket sýbsıdııalaýy kerek. Ol 6 mln teńgege Ońtústik Qazaqstan oblysynan 230 bas «Ordabasy» atty asyl tuqymdy qoı satyp aldym. 2016 jyly qazan aıynda alǵan nesıemniń syıaqysymen negizgi borysh bereshegi, ıaǵnı 1 mln 200 myń teńgeni bankke quıdym. Oblystyq Aýyl sharýashylyǵy basqarmasy nesıeni baǵdarlama boıynsha sýbsıdııalaýy tıis bolatyn. Biraq maǵan 2016 jyly qaıtarylýy tıis sýbsıdııa, jalpy 600 myń teńge tólenbedi, - deıdi Muhtar Aqynov.
2016 jyldyń esebine enip turǵan sharýany jyldyń sońynda sýbsıdııa tóleýdi júzege asyratyn oblystyq Aýyl sharýashylyǵy basqarmasynyń mamandary «Ázirge qarjy joq. Keıingi tizimge qosamyz» degen qurǵaq ýádemen shyǵaryp salady. Osylaı bastalǵan sýbsıdııa sergeldeńi áli jalǵasyp otyrǵan kórinedi. О́tken 3 jyl ishinde sharýa bankke 5 mln teńgeden astam aqsha tólep, nesıesin ótegen eken. Al memleket qaıtarýy tıis sýbsıdııa somasy 1 mln 800 myń teńge shamasynda.
Toqeteri, sharýa bul másele boıynsha tıisti organdarmen sottasqan da eken, ádildik tappapty. Endi Prezıdent Qasym-Jomart Toqaevtyń atyna joldaǵan hatynan keıin oblys ákiminiń qabyldaýyna qol jetkizgenine qýanǵan ol ádilet ornap, eńbegi aqtalatynyna senimdi. Alaıda sharýany bul máseleni oblystyń aýyl sharýashylyǵyna jaýapty sheneýnikterdiń qalaı sheshetini ázirge belgisiz qalyp otyrǵany da alańdatady.
