Baıandama jasaǵan bilim jáne ǵylym mınıstri Ashat Aımaǵambetov joǵary oqý oryndaryn ońtaılandyrý, joǵary oqý oryndarynyń akademııalyq jáne basqarý derbestigin keńeıtý jónindegi sharalar, daryndy balalardyń qabiletterin damytý jónindegi jumystardy kúsheıtý, mektep dırektorlary men balabaqsha meńgerýshilerin taǵaıyndaý júıesin qaıta qaraý jáne taǵy basqa máseleler týraly jan-jaqty habardar etti.
«Mańyzdy máselelerdiń biri – kadrlardy qaıta daıarlaýdy sapaly júzege asyrý bolyp tabylady. Búgin 85 joǵary oqý orny pedagogtardy daıarlaýda, biz endi osy joǵary oqý oryndaryna talaptardy kúsheıtý jónindegi sharalardy qabyldaımyz. Tıisinshe, lısenzııalardy qaıtaryp alý boıynsha jumystardy júzege asyramyz. Bilim jáne ǵylym mınıstrliginiń jospary boıynsha, pedagogtar daıyndaıtyn 20-30-ǵa jýyq joǵary oqý orny qalýy múmkin. Bizge sannan góri sapa mańyzdy», - dedi A.Aımaǵambetov. Mınıstr sondaı-aq oqýlyqtardy ázirleý, sapasyn baǵalaý, basyp shyǵarý jáne monıtorıng júıesi ózgeretinin habarlady. Oqýlyqtardy ázirleýge qoıylatyn talaptar kúsheıtildi, saraptamanyń naqty sharttary anyqtaldy, sarapshylardy oqytý jáne sertıfıkattaý, avtorlardy oqytý, áleýetti sarapshylardyń bazasyn qalyptastyrý, «búrkenshek» saraptama engizý kózdelip otyr.
Senator Baqytjan Jumaǵulov bilim berýdiń árbir deńgeıiniń jaǵdaıy men problemalaryn jan-jaqty taldady. Senator mektepke deıingi bilim berý máselelerine qatysty bilikti kadrlardyń jetispeýshiligin, tárbıeshilerdiń balalarǵa qatysty tártip buzýshylyqtaryn (2017-2019 jyldary ata-analardan 203 shaǵym túsken) atap ótti. «Jaǵdaıdy lısenzııalaýdy engizý túzetýi múmkin. Biraq ony asa tez emes, qolda bardy buzyp almaı, muqııat jáne dáıekti túrde júzege asyrý kerek», dedi B.Jumaǵulov. Senator dýaldy bilim berý týraly aıta kelip, memlekettik tapsyrysty qalyptastyrý jáne túlekterdi jumysqa ornalastyrý kezinde eńbek naryǵynyń qajettiligin eskerýdi usyndy.
Joǵary bilim berý salasynda senator oqý oryndaryn tirkeýdi zańnamalyq jáne ózge de qamtamasyz etýdi odan ári jetildirý, sondaı-aq Parıj kommıýnıkesiniń (2018 j.) usynymdary boıynsha «Joǵary bilimniń Eýropalyq keńistiginde sapany qamtamasyz etý jónindegi standarttar men basshylyq prınsıpterin» úılestirýdi pysyqtaý qajettigin atap ótti. B.Jumaǵulov sonymen qatar joǵary oqý oryndarynyń derbestigin zańnamalyq keńeıtý zańnan keıingi aktilermen tolyq kólemde áli de bekitilmegen dep esepteıdi.
Dóńgelek ústel barysynda «Nazarbaev zııatkerlik mektepteri» pedagogıkalyq ólsheý ortalyǵy fılıalynyń dırektory A.Shılibaeva, «Bilim-Innovasııa» halyqaralyq qoǵamdyq qorynyń vıse-prezıdenti E.Áýbákirov, «Atameken» Ulttyq kásipkerler palatasy tóraǵasynyń orynbasary R.Alshanov, Nur-Sultan qalasyndaǵy №66 mektep-lıseı kommýnaldyq memlekettik mekemesiniń dırektory A.Shaıahmetova jáne basqalar sóz sóıledi.
Senatorlar S.Ershov, S.Bekturǵanov, D.Nóketaeva, N.Júsip, M.Baqtııaruly pedagogtarǵa jalaqyny jáne stýdentterdiń stıpendııasyn arttyrý, mektepterde smartfondardy paıdalanýǵa tyıym salý, joǵary oqý oryndaryn biriktirý tájirıbesi, dýaldy bilim berýdi jetildirý máselelerin kóterdi.
Dóńgelek ústel qorytyndysy boıynsha Úkimetke jiberiletin usynystar ázirlendi.
