«Almatylyqtar Tuńǵysh Prezıdent saıabaǵynda, 28 gvardııashy-panfılovshylar atyndaǵy saıabaq pen Naýryzbaı aýdany ákimdiginiń aldynda ashylǵan tegin muz aıdyndarynda boldy. Túrksib aýdanyndaǵy «MART» saýda úıiniń aldynda taǵy bir muz aıdyny ashylady. Syrǵanaý alańdarynyń jalpy aýmaǵy - shamamen 12 myń m². Bul - Medeý muz aıdynyndaǵy muzdyń betine qaraǵanda 1,5 myń m² artyq», dep jazdy Baqytjan Saǵyntaev Instagram-daǵy paraqshasynda.
Qala ákiminiń aıtýynsha, muz arnaıy salqyndatqysh mashınalardyń kómegimen qalpyn saqtap turady. Sol sebepti Almatynyń qubylmaly aýa raıy muzdyń erip ketýine kedergi keltirmeıdi. Syrǵanaý alańdary 10 naýryzǵa deıin jumys isteıtin bolady. Muz aıdynynda saǵat 10:30-dan 23-ge deıin jalǵa berý pýnktteri jumys isteıdi.
«Kóp ýaqytyńyzdy balalar men otbasyńyzǵa, dostaryńyzben jaqyndaryńyzǵa bólgenińiz abzal. Aınalańyzǵa kóńildi kóńil-kúı syılaı bilińiz. Jańa jyldyq kóńil-kúı kóterińki bolsyn», delingen jazbada.
