Qazaqstan men Rýmynııa arasyndaǵy dıplomatııalyq qarym-qatynastar 27 jyl buryn qalanǵan. Sol kezden bastap ekijaqty saıası, ekonomıkalyq jáne mádenı-gýmanıtarlyq saladaǵy yntymaqtastyqtyń berik irgetasy qalandy. Eki eldiń halyqaralyq bastamalaryn turaqty túrde ózara qoldaýy erekshe qýantady. Elshi 2019 jyldyń birinshi jartysynda Rýmynııanyń EO Keńesinde tóraǵalyq etýi barysynda EO-OA kún tártibiniń barlyq spektri boıynsha yntymaqtastyqqa jańa serpin berýge baǵyttalǵan Ortalyq Azııa boıynsha EO-nyń jańartylǵan strategııasy qabyldanǵanyn atap ótti.
Rýmynııa Qazaqstannyń ońtústik-shyǵys Eýropadaǵy mańyzdy saýda seriktesi bolyp tabylady. 2019 jyldyń 9 aıynda elder arasyndaǵy saýda aınalymy 1,337 mlrd. AQSh dollaryn qurady. Onyń basym bóligin Qazaqstannan shıki munaı eksporty quraıdy. Energetıkalyq áriptestikti damytýǵa «QazMunaıGaz Interneıshnl» («Rompetrol») kompanııasy eleýli úles qosýda. N. Rústemov rýmyn tarapynyń Qazaqstanmen senimdi jáne dostyq qarym-qatynastardy nyǵaıtýǵa nıeti osy jyldyń 5 jeltoqsanynda rýmyn bıliginiń «Rompetrol» kompanııasynyń burynǵy ıelerinen qalǵan qaryz boıynsha sheshimin qabyldaýymen rastalatynyn atap ótti.
Sonymen qatar Qazaqstan saýda-ekonomıkalyq yntymaqtastyqty ártaraptandyrý jónindegi jumysty jandandyrmaq. Bul úshin birqatar baǵyttar boıynsha perspektıvalar bar. Atap aıtqanda, Ońtústik-Shyǵys Eýropadaǵy iri jeke temir jol kólik kompanııasy «Grampet Grýp» Qazaqstan aýmaǵynda júk temir jol vagondaryn óndirý jáne jóndeý boıynsha birlesken kásiporyn salýdy ınvestısııalaýǵa múddeli. Sondaı-aq 2018 jyldyń qyrkúıeginde «Grampet Grýp» kompanııasynyń Transkaspıı halyqaralyq kólik baǵytyna qosylǵan alǵashqy eýropalyq kompanııasy bolǵany da mańyzdy.
Budan basqa, Býharest qalasynyń Saýda-ónerkásip palatasymen júrgizilgen kelissózder qorytyndysy boıynsha Qazaqstan aýmaǵynda mashına jasaý jáne temir jol salasy úshin qosalqy bólshekter óndirisi salasynda birlesken kásiporyndar qurý týraly kelisimge qol jetkizildi.
Sondaı-aq qazaqstandyq «Qazatomónerkásip» kompanııasy men rýmyndyq «Nýklearelektrıka» arasynda uzaq merzimdi yntymaqtastyq ornatý týraly kelisimge qol jetkizildi.
Ekijaqty qatynastardy, onyń ishinde týrızmdi jandandyrýdy damytý maqsatynda rýmyndyq «Blue Air» avıakompanııasymen tikeleı avıareısterdi ashý máselesi boıynsha kelissózder bastaldy. Rýmyn tarapy 2020 jyly Nur-sultan men Býharest arasynda testilik ushýlardy ótkizýdi usyndy.
Qazaqstan men Rýmynııanyń mádenı-gýmanıtarlyq baılanystary da oń qarqynmen damýda. Rýmynııa 2016 jyldan bastap jyl saıyn jaratylystaný jáne gýmanıtarlyq ǵylymdar jáne ǵylymı-tehnıkalyq mamandyqtar boıynsha qazaqstandyq stýdentterdi oqytý úshin granttar usynady.
Eki el halyqtarynyń arasynda senimdi jáne dostyq qarym-qatynas ornatýǵa «Shtefan Velıkıı» (Almaty), «Dachııa» (Qaraǵandy), «Býkovına» (Pavlodar) ulttyq-mádenı qoǵamdary eleýli úles qosýda.
Býharest, Konstanse jáne Klýje qalalarynda qazaq kınosynyń jyl saıynǵy kúnderin ótkizý dástúrge aınaldy. Bıylǵy jyly Rýmyn kórermenderi «Qazaq handyǵy. Altyn tron», «Shynyraý» jáne taǵy basqalary sekildi qazaq kınomatografııasynyń týyndylarymen tanysty.
2019 jyldyń shilde-tamyz aılarynda Qaraǵandy qalasynyń Táttimbet atyndaǵy akademııalyq halyq aspaptar orkestri Rýmynııanyń iri qalalarynda – Býharest, Konstanse jáne Vaslýı konserttik týrne ótkizdi. Táýelsizdik kúnge oraı, bizdiń respýblıkamyzdyń tanymal mádenıet qaıratkerleri-kompozıtor Tólegen Muhamedjanov, Opera ánshisi Nurjamal Úsenbaeva, tenor Nurjan Bajekenov rýmyn tenory Kalın Brateskýmen birge óner kórsetti.
