Eńbek jolyn «Qazaqstan pıoneri» (qazirgi «Ulan») gazetinde bastaǵan Qarshyǵa Esimseıitova ár jyldary respýblıkalyq halyq shyǵarmashylyǵy ortalyǵynda, Qazaq radıosynda qyzmet etken. Qazir Qazaqstan Jazýshylar odaǵy oblystyq fılıalyn basqaratyn Qarshyǵa Qurmashqyzy «Tańbaly tas», «Qorqyt», «Mustafa Shoqaı», «Syr óńiriniń tulǵalary» atty serııaly derekti fılmderdiń, birneshe kitaptyń avtory.
Al eki márte «Altyn dombyra» ıegeri, aıtysker aqyn Muhtar Nııazov jýyrda Oral qalasynda ótken «Tuǵyry bıik Táýelsizdik» atty respýblıkalyq aqyndar aıtysynda júldeli I oryndy ıelenip, «Aıtystyń aqtańgeri» atandy.
Qabyldaýda aımaq basshysy bıyl óńir rýhanııatyndaǵy negizgi jańalyqtardy atap ótip, Qarshyǵa Esimseıitova men Muhtar Nııazovqa oblystyń Qurmet gramotasyn tabystady. Dástúrli ónerge ózgeshe órnek qosqan Muhtar aqynǵa dombyra syılady. Belgili mesenat, talaı daryndy jasqa demeýshilik tanytyp júrgen kásipker Murat Sársenbaev aıtysker aqynǵa jeńil avtokólik kiltin tabys etti.
Qabyldaý sońynda qos aqyn ózderine kórsetilgen qurmetke rızashylyqtaryn bildirip, el yqylasyna alǵystaryn jetkizdi.
