Oqys oqıǵa Saýmalkól aýylynda tirkelgen. «Kókshetaý-Rýzaevka» trassasy boıynda qyzmet kórsetip júrgen patrýldik polısııa ınspektorlary úılerdiń biri otqa oranǵanyn baıqap qalady.
«Áriptesim ekeýimiz «Kókshetaý-Rýzaevka» avtojolynda kezekshilikte júrgenbiz. Tańǵy saǵat 6 kezinde janarmaı quıý stansııasyna jaqyn úıdiń órtenip jatqanyn kórip, jedel járdemge umtyldyq. Baspanaǵa jaqyndaǵanymyzda kómek suraǵan daýystardy estidik. Qyzyl tili sýmańdaǵan órt ishinen balalar men eki áıeldi alyp shyqtyq» deıdi patrýldik polısııa qyzmetkeri Erlan Dankın.
Úı ishinde eki áıel jáne kámeletke tolmaǵan tórt bala bolǵan. 60 jastaǵy áıel oqys dybystan oıanyp ketken. Osy kezde kómekke jetip úlgirgen tártip saqshylaryna bir jasar jáne segiz aılyq qyzdardy qutqarady. Qoıý tútinge oranǵan bólmeniń ishine Azamat Býkýev kirip, 7 jáne 17 jasar qyz balany, úıdiń ıesi men 34 jastaǵy týysyn syrtqa shyǵarady. Úıde eshkimniń qalmaǵanyna kóz jetkizgen tártip saqshylary kezekshi bólimge órt týraly habarlap, órt sóndirýshilerdi jáne jedel járdem shaqyrǵan.
Dárigerler balalardyń densaýlyǵyna eshqandaı kinárat kelmegenin anyqtaǵan.
