Vladımır Klıchko túngi klýbta tóbeles shyǵardy

Kesheli beri álemdik ǵalamtor ýkraınnyń ataqty kásipqoı boksshysy Vladımır Klıchkonyń Ispanııadaǵy Ibısanyń túngi klýbtarynyń birinde óziniń burynǵy qarsylasy Derek Chısoramen shekisip qalǵany týraly aqparatqa tunyp tur.

«Ispanııa kýrortyna demalýǵa kelgen aýyr salmaqtaǵy qos boks­shy kútpegen jerden túngi klýbta kezdesti. Bir-birlerin kórgen boıda sózge kelisip qalǵan 37 jastaǵy ýkraın men 29 jasar brıtanııalyq jigittiń ustasýy kóp uzamaı tóbeleske ulasty. Olardyń teketiresin tek klýbtyń ýaqytynda jetken kúzetshileri ǵana áreń aıyra aldy», – delingen sol derekkózderdiń birinde.

Mundaı oqıǵanyń oryn alǵanyn Chısoranyń jattyqtyrýshysy Don Charlz da joqqa shyǵara qoımady.

«Iá, eki boksshynyń bir-birine degen kózqarasy túzý dep aıtý qıyn. Biraq olar demalyp jatqan jerlerinde túngi klýbta joq jerden jolyǵyp qaldy», – dep málimdedi ol.

Esterińizde bolsa, ótken jyldyń aqpan aıynda Dúnıe­júzilik boks keńesiniń (WBC) nusqaýy boıynsha álem chempıony ataǵy úshin tartysty kezdesý aldynda ótken ólsheý rásimi kezinde brıtanııalyq boksshy ýkraınalyq qarsylasy Vıtalıı Klıchkonyń jaǵynan shapalaqpen tartyp jibergen edi. Kelesi kúni kezdesý qarsańynda shymqaı qara tústi jigit básekelesiniń inisi Vladımır Klıchkonyń betine túkirip jibergen bolatyn.

Sol kezde Vıtalıı anglııalyq báleqordy bul qylyǵy úshin sharshy alańda sybaǵasyn beretinin aıtyp edi. Aqyry sońynda Klıch­ko­lar­dyń úlkeni sol sózinde turyp, qarsylasyn rıngte biraz tópelep aldy. Biraq, nokaýtqa túsire almady. Ol osylaısha Chısorany upaı sanymen jeńip shyqty.

Artynan Búkilálemdik boks keńesi Chısorany álgindegi ádepsiz qylyǵy úshin jazaǵa tartyp, oǵan $50 myń aıyppul salǵan bolatyn. Alaıda, bul jaza brıtandyq sportshyny aqylǵa shaqyra almaǵan tárizdi. Klıchkomen bolǵan kezdesýden keıin birneshe saǵattan soń-aq baspasóz májilisi ústinde ol Búkilálemdik boks qaýymdastyǵynyń (WBA) nusqaýy boıynsha burynǵy álem chempıony Devıd Hedpen ustasyp úlgerdi. Tipti, sol oqıǵadan keıin ol Devıdti atyp óltirem dep qorqytqanyn da jurtshylyq áli umyta qoımaǵan shyǵar.

Mine, sol Derek taǵy da kórgensiz áreketimen kózge túsip otyr. Derekke ózi ne kerek?

Murat AITQOJA.