Búgin Úrjar aýdanynyń Kókózek aýylynda «Rýhanı jańǵyrý» baǵdarlamasy aıasynda «Ult rýhanııaty – urpaq tárbıesiniń negizi» atty aýdandyq semınar ótti.
«Semınarǵa Úrjar aýdany ákiminiń orynbasary Birjan Turlybekov, aýdandyq Ishki saıasat bóliminiń basshysy Eldos Beısenov jáne Bilim bóliminiń ókilderi, aýdan mektepterinen kelgen dene shynyqtyrý pánderiniń oqytýshylary, oqýshylar jáne jastar qatysty. Sharanyń maqsaty: halqymyzdyń ǵasyrdan jalǵasyp kele jatqan salt-dástúrlerin dáripteý, búrkit salý, at úıretý sııaqty ulttyq oıyn túrlerimen tanystyrý.
Sharanyń ashylý saltanatynda aýdan ákiminiń orynbasary B.Turlybekov semınarǵa qatysýshylardy quttyqtap, sharanyń ótýine uıytqy bolǵan Táttimbet Kápulyna aýdan ákimi S.Zaınýldınniń alǵys hatyn tabystady.
Ashylý saltanatynan keıin qatysýshylar mekteptegi ulttyq kabınetke baryp, ulttyq oıyndardyń ereksheligimen jáne ulttyq oıyndardyń úlgilerimen tanysty. Shara qonaqtary qus baptaý jáne qamshy órý sekildi ulttyq qundylyqtar jaıyndaǵy qundy maǵlumattarǵa qanyqty. Táttimbet Kápulynyń shákirtteri ulttyq dástúr týraly jyrlaryn oqyp, sharanyń kórkin kirgizdi. «Ult rýhanııaty – urpaq tárbıesiniń negizi» atty teorııalyq sabaqtan keıin qatysýshylar at baptaý, búrkit salý syndy qundylyqtarymyzdy tamashalaý úshin mektep aýlasyndaǵy arnaıy orynǵa bardy.
Shara qonaqtary ulttyq ábzelmen kómkerilgen at mingen atbegiler men aýdannyń túkpir-túkpirinen jınalǵan búrkitshilerdiń ónerin tamashalady.
Sharanyń sońy «Men – qazaqpyn» dep atalatyn shyǵarmashylyq keshke ulasty. Kesh barysynda ónerpazdar óz ónerlerin ortaǵa salyp, semınar qonaqtarynynyń erekshe qoshemetine bólendi. Shara sońynda qatysýshylar aýdan ákiminiń, Bilim bólimi basshysynyń Alǵys hattarymen marapattaldy» delingen aýdandyq Ishki saıasat bóliminiń feısbýktegi paraqshasynda.
Shyǵys Qazaqstan oblysy,
Úrjar aýdany,
Kókózek aýyly
Sýretter Úrjar aýdandyq Ishki saıasat bóliminiń feısbýktegi paraqshasynan alyndy
