151 shaqyrymǵa sozylǵan jarysta Qazaqstandyq komandanyń ókili Lýıs Leon Sanches te belsendilik baıqatty. Alaıda ıspan jigitin márege birneshe shaqyrym qalǵanda qalyń top qýyp jetti. Al, Boaro úzdik úshtiktegi ornyn saqtap qaldy. Italııalyq velosportshy máre syzyǵyn úshinshi bolyp kesti. 6-kezeńde brıtanııalyq Metıý Holms jeńimpaz atandy. Ol Avstralııalyq Rıchı Portty basyp ozdy. «Týr Daýn Ander» kópkúndiginiń jalpy esebinde Port top jardy. «Astanalyqtar» arasynan Omar Fraıle úzdik nátıje kórsetip, 17-orynnan kórindi. Avstralııada tennısten bıylǵy jyldyń alǵashqy úlken shlem jarysy qyza tústi. Jekeleı syndaǵy oıyndarda Qazaqstandyq sportshylar jarystan shyǵyp qaldy. Endi juptyq syndaǵy saıystarǵa kóz tigemiz. Mıhaıl Kýkýshkın men Aleksandr Býblık juby shırek fınalǵa shyqty. Qazaqstan tennısshileri úshinshi aınalymda Amerıkalyq Sem Kýerrı men Stıv Djonsonnan basym tústi. Esep: 6:4, 6:2. Endi jerlesterimiz jartylaı fınal joldamasyn Djeıms Dakvort - Mark Polmans jubymen sarapqa salady. Erler arasyndaǵy jekeleı synda Avstralııa ashyq birinshiliginiń qazirgi chempıony Novak Djokovıch jarysty jalǵastyrady. Serbııalyq tennısshi Argentınalyq Dıego Shvarsmannyń osal tusyn tapty. Endi ol shırek fınalda Kanadalyq Mılosh Raonıchpen kezdesedi.
