Al mektep kitaphanasynda oqýshylar ózderi ósirgen gúl aǵashynyń butaqtaryna Abaı atanyń naqyldary jazylǵan juldyzsha qaǵazdar iledi.
Juldyzshalarda «Qys», «Kúz», «Jaz», «Jazǵytury» sekildi óleńderi jazylǵan.
Ásempaz bolma árnege,
О́nerpaz bolsań arqalan.
Sen de bir kirpish dúnıege,
Ketigin tap ta, bar, qalan,
dep ekinshi bir juldyzshaǵa jazylady.
– Árbir juldyzsha qaǵaz butaqtarǵa zııan keltirmeıtindeı jińishke jiptermen baılanady. Qaǵazǵa jazylǵan «Bes nárseden qashyq bol, bes nársege asyq bol, adam bolam deseńiz. О́sek, ótirik, maqtanshaq, erinshek, beker mal shashpaq – bes dushpanyń bilseńiz. Talap, eńbek, tereń oı, qanaǵat, raqym oılap qoı, bes asyl is kónseńiz» degen naqyl sózderi jattaýǵa jeńil ári birden oqýshylar esinde qalady, – deıdi kitaphanashy.
Qazaq tilinde oqıtyn ózge ult ókilderiniń ul-qyzdary Marııam Abın, Murat Gross, Mýmadı, Mılana Abýbakarovtar, Nılýfar Ganıevter de «Qan sonarda búrkitshi shyǵady ańǵa», «Qalyń elim, qazaǵym, qaıran jurtym», «Jelsiz túnde jaryq aı» sekildi Abaı óleńderin, naqyl sózderin jatqa biledi.
Oqýshylar bir ýaq qoldaryndaǵy uıaly telefondaryn tastap, ádebı kitaptar oqýdy ádetke aınaldyrǵan.
Gúl aǵashyndaǵy juldyzshalarǵa jazylǵan naqyl sózderdi, óleńderdi kezektesip aýystyryp otyrady. Barlyǵy da «Kitap janashyrlary» úıirmesiniń músheleri.
– Kitaphanamyzda oqýlyqtar, ádebı kitaptardyń 14406 dana qory bar. Tóken Gúlzada, Esqalı Aıym, Sosıal Zarına, Temir Jarqyn, Elýbaı Nuraı, Janerke Bekturova, Túsipbek Jeńis, Zeınish Bekzat, Muhamedjan Samat, Altynaı Qalelova sııaqty oqýshylar – turaqty oqyrmandar, – deıdi Ýlfat Qojanbaeva.
Mektep kitaphanasynda jańa kitaptardy tanystyratyn «Aýyzsha jýrnal» kúni, rýhanı-mádenı taqyryptaǵy kórmeler, oqyrmandarǵa arnalǵan suhbat-kezdesý kúnderi ótkiziledi.
– Abaı atamyzdyń mereıtoıyna arnalǵan sharalar mektebimizde jyl boıy jalǵasady. О́negeli sózi, úlgili ósıeti kóp. Taýsylmas rýhanı qazynasyn oqýshylar jadyna sińire bilýimiz kerek, – deıdi mektep dırektory Álııa Anafına.
Pavlodar oblysy,
Maı aýdany
