Alǵa qoıǵan maqsatqa jetý úshin adam kerek kezinde óz raıynan qaıtyp, tipti kózqarasyn da ózgertkeni durys bolady eken. Iаǵnı, basqalarmen til tabysý úshin adam jaıly jáne ymyraǵa kelgish bolýy tıis. Basyna keremet oı kelgen adam kompanııasyn ashyp, joıqyn kúshpen jumysqa kirisem degende, aldynan oılamaǵan jerden nebir problemalar shyǵyp, jumysqa bóget bolar oqıǵalarǵa kezdesip, jaǵdaı ózgerip ketedi. Sol sebepti qataıyp qatyp qalmaı, ózińniń de kemshiligińdi moıyndap áreket etýge týra keledi.
Birinshi qadam – basqalardan erekshe jáne kúshti bolý. Ballıstıkalyq raketa qajet bolyp, ony álemde keremet jasaıtyn Reseıge baryp suraǵan eken. Ár danasy 8 mln dollar degende shalqasynan túse jazdaǵan Ilekeń, eline qaıtyp kelip sol raketany ózim nege jasamasqa dep sheshken. Artynsha sapasy olardan artyq, biraq baǵasy qoljetimdi raketa jasap shyǵaratyn kompanııa ashyp, degenine jetken. Árıne ol úshin de talaı ter tógip, eńbek etýge týra kelgen. Álemdik úlken naryqqa shyǵatyn adam basqalardan kúshti bolmasa eńbektiń dalaǵa ketkeni.
Ekinshi qadam – syndy syrttan bireýden estigenshe ózińdi qatty synaý, ıaǵnı óz kemshiligińdi moıyndap, ony túzetý úshin durys baǵytta jumys isteý. Jany ashyp ári usynysymen birge aıtylatyn syn altynnan da qymbat ekenin aıtqan kásipker dostary men jaqyndarynan únemi syn-eskertpeler jınap júrgen adam ǵana damıdy degendi aıtady.
Úshinshi qadam – janyńa tek qana myqtylardy jınaý. Ilon Mask ekonomıka men fızıka salasynda qanshama bilgir bolsa da kóptegen suraqtarǵa jaýap taba almaı qınalatynyn mysalǵa keltirdi. Sondyqtan da kóbine myqty mamandardan aqyl-keńes surap, olardyń kásibı pikirlerine toqtam jasaıtynyn aıtty. Tipten mundaı kezde sizge unamaıtyn oǵash oılar bolsa da olardy qayldaýǵa týra keletinin eskertti.
2050 jyly Marsty otarlamaqshy bolyp otyrǵan amerıkandyq kásipker myńdaǵan Spaceship raketalarynan ǵaryshtyq flot jasaqtap, qyzyl planetada mıllıon adam qonystandyrmaqshy oıy bar ekenin atap ótpeske bolmas.
