Jaqynda ǵana apatty jaǵdaı bolsa, adamdar qalaı aman qalatynyn kórsetken synaq retinde jasalǵan ushýdy uıymdastyrdy. Ushqan raketa arnaıy jarylyp, kapsýlaǵa otyrǵyzylǵan eki maneken aman-esen jaǵalaýǵa jaqyn sý betine qonǵan bolatyn. Bul synaq NASA-nyń basqa jekemenshik ǵarysh kompanııalarymen birlesken kommersııalyq baǵyttaǵy baǵdarlamasy boıynsha júzege asyp jatyr. Jospar boıynsha kompanııa astronavttardyń ushýyn ǵana emes, olardyń qoný máselesin de sheship qoıǵan.
NASA 2011 jyldan bastap «Speıs shattldyń» dáýreni bitken soń astronavttardy ǵaryshqa attandyryp, jerge alyp qaıtý úshin reseılik «Soıýz» korablderinen oryn jalǵa alyp keledi. Biraq ár ǵaryshkerge 85 mln dollar ketetinin eskersek, SpaceX kompanııasymen seriktes bolý tıimdi bolyp tur. Sol sebepti de ǵarysh agenttigi Commercial Crew baǵdarlamasyn qabyldap, jańasha múmkindikter izdestirýde.
Bob Benke men Dag Herlı jekemenshik ǵarysh korablimen halyqaralyq ǵarysh stansasyna baratyn alǵashqy adamdar bolmaqshy jáne olar AQSh-tyń ǵaryshtyq saparlarynda jańa dáýir bastalatynyna senimdi. Joǵaryda atalǵan baǵdarlama boıynsha Boeng kompanııasy ǵaryshqa saparlar uıymdastyrmaqshy oıda eken. Degenmen, SpaceX olardyń aldyn oramaqshy.
Halyqaralyq ǵarysh stansasyna ary-beri astronavt tasýdy moınyna alyp otyrǵan SpaceX kompanııasy Falcon 9 raketasyn ushyrǵannan keıin josparly túrde jaryp kórip, odan arnaıy manekender otyrǵan arnaıy Crew Dragon A kapsýlasyn esh zaqymsyz qondyrǵan bolatyn. Bul ushý aldyndaǵy eń negizgi sátti jattyǵý bolatyn. Osylaısha ǵaryshqa saparlaýdyń jańa dáýiri bastalmaqshy.
Iske asyp jatqan tehnologııalyq úrdis AQSh ekonomıkasyna kóp paıdasyn tıgizeri anyq. Úkimetpen mıllıardtaǵan dollarǵa kelisimshartqa otyrǵan SpaceX jáne Boeing kompanııalary ózine de, ózgege de tıimdi bolatyn qyrýar sharýalar atqarmaqshy bolyp otyr.
Ekıpaj músheleriniń daıyndyǵyna kelsek, joǵaryda atalǵan eki astronavt 20 jyldan beri birge jumys istep kele jatqan áriptester retinde bir-birin óte jaqsy biledi jáne osy saparǵa 2018 jyldan beri túpkilikti daıyndalýda kórinedi. Qaýipsizdik máseleleri boıynsha Bob Benke men Dag Herlı Crew Dragon ǵarysh korabliniń ishki júıesin búge-shigesine deıin ábden zerttep, óz usynystaryn aıtyp, eskertpelerin bergen. Kúndelikti jattyǵýdan qoldary bosamaıtyn ǵaryshkerler ushatyn kúndi asyǵa kútýde ekendikterin aıtqan.
