«Jas óspirimder arasynda osy Qazaq kúresinen birinshiliktiń alǵash ret Aqtaý qalasynda ótýi, oǵan qoldaý tapqany qýantady. О́ıtkeni, jyldan jylǵa ata-analar tarapynan qazaq kúresine degen qyzyǵýshylyq artyp keledi. Osyǵan oraı, jańa oqý jylynan bastap osy sport túrin mektepterde pán retinde engizýdi josparlap otyrmyz. Aldymen, Nur-Sultan qalasy men Mańǵystaý oblysynda pılottyq joba retinde iske asyrylady. Baǵdarlamasy ázirlenip, mamandar daıarlaý barysy qolǵa alyndy», - dedi Qazaq kúresi federasııasynyń bas hatshysy Baqdaýlet Sábıtov.
Osy baǵytta jyldyń sońyna deıin Qazaq kúresi akademııasy qurylyp, mamandar daıyndaý jumystary júrgizilmek. 1-4 synyptarǵa qazaq kúresinen akrobatıka retinde, al 5-11 synyp oqýshylary arasynda arnaıy pán retinde ótkiziledi dep josparlanýda. Sondaı-aq qyz balalar da osy sport túrimen aınalysýǵa múmkindikter jasalǵan.
«Osyndaı bedeldi jarystardy ólkemizde ótkizý arqyly qazaq kúresiniń oblysymyzda qarqyndy damýyna erekshe ekpin beremiz», - deıdi uıymdastyrýshylar.
