Anadoly elinde jas órender de ózderin jaqsy qyrynan kórsetti. Ásirese, 59 kılo salmaq dárejesinde kúsh synasqan Baǵjan Qanattyń ónerine jankúıerler aıryqsha tamsandy. Alty básekeniń barlyǵynda aıqyn basymdyq tanytqan qazaqtyń jas perisi bas júldeni qanjyǵasyna baılady.
Kezinde Baǵjannyń ákesi – Erjan Jumasilov te Jetisý óńirine tanylǵan myqty balýan boldy. Erkin kúresten biraz belesti baǵyndyrdy. Toqsanynshy jyldardyń basynda shyǵys jekpe-jegine den qoıǵan Erjan Qanatuly jaýyngerlik ónerdiń de san túrin meńgerdi. Mine, endi ákege tartyp týǵan ul taekvondoshylar arasyndaǵy jarystarda jasyndaı jarqyrap júr. Sóz oraıy kelgende Baǵjan batyr Tólegen Tileýmuratov, Nurbek Bazylov, Nurbolat Jańbyrov jáne Arman Shylmanov syndy maıtalman mamandardan tálim-tárbıe alǵanyn aıta ketken jón.
Sonymen qatar 48 kılo salmaqtaǵy Ilııas Jarylǵasynovtyń da asqan sheberligine jınalǵan jurt tánti boldy. Ol da altyn tuǵyrǵa kóterildi. Al Ábdýrahman Marıpov (73 kılo), Jánııa Ámirhan (52 kılo) jáne Kámıla Aımuqasheva (49 kılo) kúmis alsa, Nurrıza Turarova (68 kılo) qolaǵa qol sozdy.
Esterińizge sala keteıik, jarystyń alǵashqy kúni Qazaqstannyń ulttyq quramasy úsh kúmis pen tórt qola medaldi ıelendi. Atap aıtsaq, Álimjan Serikbaev (63 kılo), Smaıyl Dúısebaı (87 kılo) jáne Jansel Denız (73 kılo) fınalda ǵana utylsa, Eldar Birimbaı (68 kılo), Aqsaýle Erqasymova (+73 kılo), Les Abdýssamat (74 kılo) jáne Rýslan Japarov (+87 kılo) úshinshi orynǵa taban tiredi.
