Keńesti asha otyryp, vıse-premer el basshylyǵy jastarǵa rýhanı-adamgershilik tárbıe berýdi kúsheıtý, naqty tájirıbelik jáne ıdeologııalyq paıda ákelýi tıis mádenı-buqaralyq is-sharalardy sapaly ótkizý mindetin qoıǵanyn atap ótti.
«Bıyl uly aqyn Abaı Qunanbaıulynyń 175 jyldyǵyna, Ál-Farabıdiń 1150 jyldyǵyna, Altyn Ordanyń 750 jyldyǵyna jáne Uly Otan soǵysyndaǵy jeńiske 75 jyl tolýyna oraı kóptegen mereıtoılyq is-sharalar ótkiziledi. Osy is-sharalardyń barlyǵyn muqııat taǵy bir ret taldap, ıdeologııalyq sıpatyn arttyrý kerek. Sondaı-aq barlyq shyǵyndardy ońtaılandyryp, bólingen qarajatty halyq ıgiligine jumsaý qajet», — dedi ol.
Berdibek Saparbaev buqaralyq sporttyń ásirese jastar arasynda damý qarqyny tómen ekenin atap ótti.
«Mınıstrlik bul baǵytta óńirlermen tyǵyz baılanys ornatýy tıis. Kóptegen is-sharalar halyqtyń basym bóligi ómir súretin oblystarda ótkiziletini málim. Jyl saıyn respýblıka boıynsha kóptegen jańa sport keshenderi men mádenıet ǵımarattary salynyp jatyr. Degenmen tájirıbe kórsetkendeı, sol ǵımarattardyń basym bóligi demalys jáne meıram kúnderi, keshki ýaqyttarda paıdalanylmaıdy. Balalarǵa bos ýaqyttarynda tegin nemese jeńildetilgen túrde túrli úıirmelerge, seksııalarǵa, kitaphanalarǵa, teatrlarǵa jáne basqa da nysandarǵa baratyn jaǵdaı jasaý qajet. Jastardyń jumyspen qamtylýyn qamtamasyz etý – kámeletke tolmaǵandar arasynda rýhanı-adamgershilik tárbıe berýdiń jáne quqyq buzýshylyqtyń aldyn alýdyń mańyzdy aspektisi», — dedi B. Saparbaev.
Vıse-premer aýyldyq jerlerde dene shynyqtyrý-saýyqtyrý keshenderin salý, «Altyn Shaıba», «Bylǵary dop» sekildi iri balalar men jasóspirimder jarystaryn ótkizý, aýdandar men aýyldarda respýblıkalyq shyǵarmashylyq birlestikter men ujymdardyń gastrolderin ótkizý jumystaryn jandandyrýdy tapsyrdy.
Berdibek Saparbaev týrıstik ındýstrııany damytýdyń mańyzdy áleýetin atap ótti.
«Qazaqstan ishki týrızmdi damytý úshin de, sheteldik qonaqtardy qabyldaý úshin de úlken áleýetke ıe. Bizdiń elimizdiń aýmaǵy úlken, baı tarıhı jáne mádenı murasy, biregeı tabıǵaty bar. Alaıda biz qolda bar múmkindikterdi tolyǵymen paıdalanyp jatqan joqpyz. Negizgi másele – atalǵan salaǵa strategııalyq ınvestorlardy tartý. Arnaıy Kazakh Tourism kompanııasyn qurdyq, kóp áńgime boldy, biraq naqty nátıjeler ázirge joq», — dedi ol.
Buǵan qosa vıse-premer til saıasatyn, prosessýaldyq sportty, kıno ındýstrııasyn damytý, Elbasynyń «Bolashaqqa baǵdar: Rýhanı Jańǵyrý» baǵdarlamasy men «Uly dalanyń jeti qyry» maqalasy aıasyndaǵy is-sharalardy júzege asyrý boıynsha birqatar naqty mindet qoıdy.
