«Parazıtter» – trıller elementi bar dramalyq formattaǵy erekshe fılm. Rejısserdiń ózi aıtpaqshy, «kloýndarsyz komedııa nemese zalymdarsyz tragedııa». Kúlip otyryp qaıǵyrasyń, sóıte tura záreń zár túbine ketedi. Úmitke aldaýsyratqan úreı bir sát te tynyǵýǵa murshańdy keltirmesten qýalaı beredi. Ádemi kórinis pen ómir raqatyn sezinip, boı jazyp keriletin ýaqyt emes, qaıtken kúnde tiri qalýdyń amalyn tabý. Beı-bereketke toly tumandy, talasty, tartysty kúnder dál osy kúni basyn taýǵa da, tasqa da urǵan adamzat basynan ótip jatyr. Kartınada baı jáne kedeı otbasylardyń mysaly negizinde áleýmettik teńsizdik máselesi kóteriledi. Al fılm rejısseri Pon Chjýn Ho «Úzdik rejısser» syılyǵymen marapattalsa, kópshilikti dúr silkindirgen fılm buǵan qosa «Úzdik sheteldik fılm» jáne «Erekshe ssenarıı» atalymdary boıynsha jeńimpaz dep tanyldy.
Barlyǵy 24 atalym boıynsha tabystalǵan «Oskar» syılyǵynyń «Jyldyń úzdik fılmi» nomınasııasy boıynsha bıyl toǵyz týyndy – «1917», «Parazıtter», «Irlandyq», «Birde …Gollıvýdta», «Djodjo atty qoıan», «Neke hıkaıasy», «Kishkentaı áıelder», «Ford Ferrari-ge qarsy» jáne «Djoker» fılmi synǵa túsken. «Úzdik ártis» atalymy boıynsha «Djoker» fılminde bas keıipkerdi somdaǵan Hoakın Fenıks, «Úzdik áıel róli» atalymy boıynsha «Djýdı» fılminde oınaǵan Rene Zellveger ıe boldy. «Birde …Gollıvýdta» fılmine túsken Bred Pıtt «Ekinshi plandaǵy úzdik akter» júldesimen marapattaldy. Bul Bred Pıttiń alǵashqy oljasy emes, oǵan budan buryn 2014 jyly «Quldyqta ótken 12 jyl» fılminde prodıýserleriniń biri retinde «Oskar» syılyǵy tapsyrylǵan bolatyn.
