Álbette, mol túsken qardyń jerge berer paıdasy shash-etekten. Dese de, keltirer zııany da orasan zor. Erte kóktemde kún kúrt jylynyp, osy qar qaýyrt erise, sońǵy jyldary qarǵyn sýdan japa shegip kele jatqan óńirlerdiń biri – Qaraǵandy oblysyna ońaı bolmaıyn dep tur.
Osyny eskergen jergilikti atqarýshy bılik bıyl kóktemgi sý tasqynyna ázirlik jumystaryn jan-jaqty júrgize bastady. Eń aldymen sý tasqyny kezeńinde eldi mekender úshin qaýip tóndirýi múmkin 50-ge tarta gıdrotehnıkalyq qurylys nysany anyqtaldy. Joǵary daıyndyq rejimin engizgende bul jerlerde táýlik boıy kezekshilik uıymdastyrylady. Sonymen qatar óńirde gıdrotehnıkalyq qurylystarǵa baratyn joldar qardan tazartyldy. Ár nysanǵa kásiporyn qyzmetkerleri jaýapty tulǵa retinde bekitilgen.
Oblysta Buqar jyraý aýdanynyń Chkalov aýyly sý basý qaýpi joǵary aımaqtar qataryna kiredi. Qazirgi tańda bul eldi mekendi oblys jáne TJD basshylyǵy erekshe baqylaýǵa alǵan.
Oblystyq TJD bastyǵy Ibragım Kúlshimbaev bıylǵy qańtar aıynda qar normadan úsh ese kóp túskenin aıtady. Osyǵan baılanysty Nura ózeni basseınindegi ylǵal qory 157 paıyzǵa deıin ósken.
– Sý tasqynynyń aldyn alý jáne adamdardyń qaýipsizdigin qamtamasyz etý sharalaryn biz aldyn ala júrgize bastadyq. Qaýipti aımaqta ornalasqan 140 eldi meken mańyna qorǵanys úıindileri turǵyzylyp, gabıondar ornatylǵan. Byltyrǵy kóktemde Samarqan sý qoımasynan sekýndyna 620 tekshe metr jyldamdyqpen sý aqqan kezde bul úıindiler óz tıimdiligin kórsetti – erigen qar sýy eldi mekenderge jetken joq, – degen málimet berdi vedomstvo basshysy.
Búginde Samarqan sý qoımasynyń sý torabyn baqylaý kúsheıtilip, munda sý aǵyzý jumystary jospar boıynsha júrgizilip jatyr. Aqpan aıynyń sońyna deıin taǵy 14 mln tekshe metr sý aǵyzylady. Bul rette sý qoımasyndaǵy ylǵaldyń eń tómengi deńgeıi 154 mln tekshe metrden tómen bolmaýy tıis.
Qazirgi tańda «Qazgıdromet» mamandary sý tasqyny kezeńine naqty boljam jasaý úshin zertteýler men ólsheýler júrgizýde.
Qaraǵandy oblysy
