Ýly jándikterdiń ýyty jaz mezgiliniń sońyna taman, ıaǵnı qyryq kún shilde biterde qaıtyp, kún ábden sýytqan soń olardan shaǵyp alady degen qaýip bolmaýy kerek edi. Alaıda «Estimegen elde kóp» degendeı, bıyl Mańǵystaýda qys ortasynda sary shaıan shaǵyp alý oqıǵasy bir emes birneshe ret oryn aldy.
Mańǵystaý oblystyq Densaýlyq saqtaý basqarmasynyń deregi boıynsha, aldymen bir túnde jeti áıeldi saryshaıan shaǵyp alǵan. Eń birinshi jedel járdem qyzmetine júkti áıel habarlasqan. Ol Beıneý aýdanynyń turǵyny eken. Júktilikke qaýip tónýi múmkin bolǵandyqtan ol ortalyq aýdandyq aýrýhanaǵa jetkizildi. Kóp uzamaı Beıneý aýdanynyń taǵy bir turǵyny medısınalyq kómekke júginse, úshinshi oqıǵa atalǵan aýdanǵa qarasty Boranqul aýylynda 1985 jyly týǵan qyzdyń basynda boldy. Shaıan shaqqan tórtinshi jaǵdaı Qaraqııa aýdany Quryq aýylynda tirkeldi. Sońǵy úsh oqıǵa Jańaózen qalasynda tirkelip, bul jerde de áıelder zardap shekti.
Aldymen áıelderge shabýyl jasaǵan shaıandar artynsha taǵy da úsh turǵynǵa ýyn darytty. Iаǵnı, Mańǵystaý oblystyq «Jedel járdem» jáne «Jedel medısınalyq járdem» qyzmetine sary shaıan shaqty degen úsh shaǵym bul joly da Beıneý aýdanynyń turǵyndarynan túsipti. Olar – 16 jáne 17 jastaǵy qyzdar, sondaı-aq 62 jastaǵy er adam.
– Barlyq adamǵa alǵashqy medısınalyq kómek kórsetildi. Aýrýhanaǵa jatqyzýdyń qajeti bolǵan joq. Odan ári olarǵa turǵylyqty jeri boıynsha dárigerden keńes alý usynyldy, – deıdi mamandar.
Sonymen, Mańǵystaýda eki kúnde shaıan shaǵýynan on adam zardap shekti. Sary shaıandar negizinen túngi ýaqytta, ásirese tańǵa qaraı shabýyl jasaıdy eken.
Mańǵystaýda qaharyna qys emes, shaıandar minip tur. Jahandyq jylynýdyń áseri me, áıteýir qysta shaıan shaǵýdy eshkim jaqsylyqqa joryp otyrǵan joq. Qystan qymsynbaǵan shaıandar jazda ábden kúshine minip, ýyty kúsheıgen shaqta qaıtpek degen qorqynysh bar.
Mańǵystaý oblysy
