Boran qaýpi bolýy sebepti alys jolǵa shyǵýdan bas tartý týraly eskertýler men usynymdar SMS-habarlamalar men áleýmettik jeliler arqyly jappaı jiberilip jatyr. Biraq oblys turǵyndarynyń keıbiri buǵan qaramaı jolǵa shyǵyp, qar qursaýynda qalyp qoıýda. Sonyń biri – Ǵabıt Músirepov aýdanynyń 55 jastaǵy turǵyny Sergeı Tarasov. Ol keshkisin Tahtabrod aýylynan Novoıshım aýylyna bara jatqan. «Ekaterınbýrg-Almaty» tas jolyndaǵy Rýzaevka aýylynyń mańynda borannyń qursaýyna túsip, alǵa júrýge múmkindigi bolmaı turyp qalady. Osy jerde Sergeı Tarasov basqa azamattardyń qaýipsizdigin oılap, smartfonyna beıneúndeý jazyp alyp, óz tarapynan jerlesterine ózine tóngen qaýipti kórsete otyryp, jolǵa shyǵýdyń qaýipti ekenin eskertken.
Osy aýdannyń polısııa bóliminiń bastyǵy, polısııa podpolkovnıgi Aıdos Idirisovtiń aıtýyna qaraǵanda, 18 aqpan kúni qar qursaýynan 6 fýr, 6 «KamAZ», 10 jeńil kólik pen 2 «Gazel» avtokóligi shyǵarylǵan. Júrgizýshiler men jolaýshylardyń birshamasy Rýzaevka aýylyndaǵy qonaqúıge, qalǵandary lıseı jataqhanasyna ornalastyryldy. Barlyǵy ystyq tamaqpen qamtamasyz etildi.
Al Jambyl aýdanynda patrýldik polıseıler men tótenshe jaǵdaı qyzmetkerleri QHR azamatyna da kómek kórsetken. Borannyń bolatynyn aıtqan eskertýlerge qaramaı Nur-Sultan qalasynan avtokóligimen Qaırankól aýylyna shyǵyp ketken 32 jastaǵy Djan Sıaobo joldaǵy «Ýkraınskoe» aýylyna 5 shaqyrym qalǵanda qalyń qarǵa keptelip qalǵan. Saqshylar men qutqarýshylardyń, jergilikti atqarýshy organdardyń kúshimen arnaıy tehnıka jumyldyrylyp, qytaılyqtyń kóligi qardan shyǵaryldy. Djan Sıaobo da beınejazba túsirip, ózine kómek kórsetkenderge shyn júrekten alǵysyn aıtty.
О́ńirde boran áli de tynshymaı tur. Oblystyq PD bastyǵy, polısııa polkovnıgi Marat Tólebaev aýa raıynyń qolaısyzdyǵyna baılanysty jeke quramǵa qala syrtyndaǵy joldardy táýlik boıy baqylaýdy jáne kómekke muqtaj azamattarǵa jedel túrde qol ushyn berýdi tapsyrdy. Basty maqsat – boran saldarynan eshkimniń zardap shekpeýin qamtamasyz etý.
Soltústik Qazaqstan oblysy
