Keńeske «Qazaqstan qus ósirýshiler odaǵynyń» prezıdenti Rýslan Sháripov, Qazaqstannyń iri qus sharýashylyǵy kásiporyndarynyń: «Shymkent qus» JShS, «Fırma Alekrı», «Ordabasy Qus», «Esil qus fabrıkasy», «Sary-Bulaq», «Alsad Kazahstana», «Adel qus», «Alel Agro» AQ, sondaı-aq «QazAgro» UBH» AQ, «Agrarlyq nesıe korporasııasy» jáne «Azyq-túlik korporasııasy» basshylary men quryltaıshylary qatysty.
Kásipkerler men Qazaqstan Respýblıkasynyń AShM ókilderi saladaǵy ózekti máselelerdi jáne olardy sheshý joldaryn talqylady. Atap aıtqanda, jumyrtqa óndirýshiler úshin taýarlyq-erekshe sýbsıdııany qysqartý máselesi qozǵaldy.
Aýyl sharýashylyǵy mınıstri qus sharýashylyǵy AО́K basym salalarynyń biri bolyp tabylatynyn jáne onyń áleýetinen azyq-túlik qaýipsizdigi, tamaq ónerkásibi kásiporyndarynyń damý deńgeıi men qarqyny baılanysty ekenin atap ótti.
«Sońǵy jyldary birqatar memlekettik baǵdarlamalardy júzege asyrýdyń, sondaı-aq Memleket basshysy tarapynan jasalǵan qoldaýdyń nátıjesinde salada turaqtandyrýǵa qol jetkizildi jáne qus sharýashylyǵy ónimderin óndirý kólemin ósirýdiń turaqty baǵyty belgilendi. Sondaı-aq osy salaǵa Qazaqstan Respýblıkasynyń 2017-2021 jyldarǵa arnalǵan AО́K damytý memlekettik baǵdarlamasyna da kóp kóńil bólindi», dep atap ótti mınıstr.
Sonymen qatar Saparhan Omarov Aýyl sharýashylyǵy mınıstrligi salany damytý boıynsha «Qazaqstan qus ósirýshiler odaǵymen» memlekettik qoldaý tetikterin odan ári jetildirýge jáne salanyń tıimdiligin arttyrý boıynsha birlesip jumys isteýge daıyn ekenin málimdedi.
«Qus sharýashylyǵy kásiporyndarynyń basshylary óndiristik-sharýashylyq qyzmetin damytýdyń jańasha joldaryn izdestirý kerek. Qazirgi ýaqytta qus sharýashylyǵy ónimderin óndirýdi arttyrý úshin áleýet jeterlik», dep atap ótti Qazaqstan Respýblıkasynyń AShM mınıstri.
Sondaı-aq kezdesýde sala basshysy jumyrtqa óndirýshileri úshin taýarlyq-erekshe sýbsıdııa 10 jyl boıy berilgenin jáne ony 2020 jylǵy 1 qańtardan bastap qysqartý josparlanǵanyn aıtty. Desekte, Aýyl sharýashylyǵy mınıstrligi osy sýbsıdııany memlekettiń ımportqa táýeldilikti tómendetý jáne et qus sharýashylyǵyn damytýǵa baǵyttalǵan túrine aýystyrý boıynsha sala mamandarynyń usynystaryn qaraýǵa daıyn ekendigin aıtty.
Eske salsaq, Aýyl sharýashylyǵy mınıstri Saparhan Omarov agroónerkásiptik keshen men tamaq ónerkásibin damytý máseleleri boıynsha kezdesýden keıin osy saladaǵy problemalyq máselelerdi anyqtap ári tolyq zerdeleý maqsatynda ár apta saıyn salalyq qaýymdastyqtarmen jáne iri óńdeýshi kásiporyndarmen kezdesýler uıymdastyrý týraly sheshim qabyldaǵan bolatyn. Keleli kezdesýler úshin ár aptanyń senbisi tańdaldy.
О́tken jyly vedomstvo basshysy Qazaqstannyń astyq óńdeýshiler jáne nan pisirýshiler Odaǵynyń, qoı sharýashylyǵy boıynsha Respýblıkalyq palatanyń, kredıttik seriktestikter qaýymdastyǵynyń, Qazaqstannyń qant, tamaq jáne qaıta óńdeý ónerkásibi qaýymdastyǵynyń, Qazaqstannyń kartop jáne kókónis ósirýshiler odaǵynyń múshelerimen kezdesti. Árbir kezdesýdiń qorytyndysy boıynsha kóterilgen máselelerdi sheshý úshin naqty júıeli sharalar jasaldy.
