Qostanaıda ulttyq ortalyq jetekshileri bas qosty

Aımaqtar • 24 Aqpan, 2020

Qostanaıda ulttyq ortalyq jetekshileri bas qosty

14 ret kórsetildi

Jıynǵa óńirdegi 17 etnomádenı birlestiktiń jetekshileri qatysty. Basqosýda Assambleıanyń óńirdegi áleýmettik turaqtylyqty damytýda mańyzdy orynǵa ıe ekendigi aıtylyp, ulttyq birlestikterdiń búgingi qoǵamdaǵy tynys-tirshiligi týraly sóz boldy.

Nurqanat QULABAEV

Oblystyq Qazaqstan halqy assambleıasy hatshylyǵynyń meńgerýshisi Bıbigúl Aqqojına ulttyq ortalyqtardyń áleýmettik jaýapkershiligine joǵary baǵa berip, olardyń qaıyrymdyq sharalaryna belsendi at salysatynyn atap ótti. Máselen, ótken jyly óńirde oblystyq Assambleıa 627 qamqorlyq aksııasyn uıymdastyryp, 200 mıllıon teńgeden astam qarjyny qaıyrymdylyqqa jumsaǵan. Munyń syrtynda, aýdandar men qalalarda jumys istep jatqan Qoǵamdyq kelisim keńesi, Analar keńesi sııaqty Assambleıanyń qoǵamdyq qurylymdary iri sharýashylyqtarmen birlese otyryp, sport, mádenıet jáne bilim salasyna turaqty demeýshilik kórsetip keledi. Ulttyq birlestikter jalǵyzbasty qarttar men ata-ana qamqorlyǵynan qaǵylǵan jetimekterge de qol ushyn sozyp, qamqorlyq tanytýdan tanǵan emes. Birqatar etnomádenı birlestikter qazaqtyń keıbir ulttyq dástúrlerin qaıta jańǵyrtyp, qoǵam ıgiligine jaratýda. Mysaly, «Vaınah» sheshen-ıngýsh ortalyǵy men «Ahyska» túrik etnomádenı birlestigi byltyrdan beri «Sybaǵa» qaıyrymdylyq jobasyn qolǵa alyp, kóp balaly 11 otbasyn qamqorlyqqa alǵan. Armıan jáne sheshen-ıngýsh ulttyq ortalyqtary «Toqymqaǵar» dástúrin tiriltip, oblystyq Jasóspirimder úıiniń oqýshylaryna turaqty demeýshilik kórsetip keledi. Igi sharadan koreı ulttyq birlestigi de qalys qalyp jatqan joq. Olar «Baqytty otbasy» jobasyn júzege asyrýǵa at salysyp, turmysy tómen 3 otbasynyń baspana baqytyna ıe bolýyna muryndyq bolyp otyr.

Basqosý barysynda Assambleıanyń elimizdegi qoǵamdyq kelisim men ultaralyq tatýlyqty damytý baǵytynda atqarǵan jumysy týraly másele qozǵaldy. Bul baǵytta da aıtarlyqtaı jetistikter bar. Máselen, ulttyq ortalyqtar óńirde medıasııa salasynyń damýyna súbeli úles qosyp keledi. Búginde oblystyq QHA janynan 1 medıasııa kabıneti, sottar, ákimdikter jáne úkimettik emes uıymdar janynan 27 kabınet jumys isteıdi. Olardyń tikeleı aralasýymen ótken jyly 146 azamattyq jáne turmystyq daý sheshilip, taraptar ózara ymyraǵa kelgen.

Jıyn barysynda minberge shyqqan «Vaınah» sheshen-ıngýsh ortalyǵynyń jetekshisi Elbrýs Tımaev sózin «Qazaq halqyna rızamyn!» - dep bastady. - Sonaý toqsanynshy jyldardyń qıyndyǵyn barlyǵyńyz bilesizder. Qıyn zamanda Elbasymyzdyń sońynan erip, damýdyń dańǵyl jolyna tústik. Elimizdi meken etken barsha ult birlikte ómir súrip keledi. Osy baǵyttan adaspaı, ilgerileı berýimiz kerek. Eń bastysy, ózimizdi, urpaǵymyzdy durys tárbıeleýimiz kerek. Árıne, qoǵam bolǵan soń, usaq-túıek kıkiljińsiz bolmaıdy.Ony órshitpeı, tez arada kelisimge keler jol izedp tabýdy úıreneıik. Qazaqstanda turatyn bir adamnyń shashy jerge tússe, oǵan bárimiz jaýaptymyz. Sondyqtan bir úıdiń balasyndaı, tatý-tátti ómir súrýge, bir-birimizge qulas asýǵa úıreneıik, - degen birlestik jetekshisi kópshilikti alda kele jatqan Alǵys kúnin laıyqty qarsy alýǵa shaqyrdy.

Qostanaı oblysy

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz