Árıne aýyldyq jerlerge gazet keshigip keledi. Ony kútip otyrmaı, aptasyna 6 ret shyǵatyn gazetti tańerteń ınternet jelisi arqyly qarap, kúndelikti jańalyqtarǵa, maqalalarǵa sholý jasap shyǵamyn. Tańerteń gazettiń sol kúngi sanyn qaraǵanda tań atpaı 170-200 oqyrmannyń qaraıtynyna kýá bolyp júrmin.
Eń aldymen, tól gazetimizde Prezıdenttiń jarlyqtary, sheshimi, taǵy basqa taǵaıyndaýlar, Úkimettiń qaýlylary naqty jarııalanady. Eshqandaı basqa dáldikti, habarlamany qajet etpeıdi. Sonymen birge «Ádebıet», «Mıras», «Jádiger», «Zerde» aıdarlarynan ózime qajetti materıaldardy alyp, saqtap qoıamyn.
Jaqynda «Qazaqstan» ulttyq telearnasynan «Sen de bir kirpish dúnıege» atty baǵdarlama kórsetildi. Tól gazetimizdiń Basqarma tóraǵasy D.Qydyráli tizgindi ózi alyp júrgizýmen qatar, kórermenderdiń kóptegen suraǵyna jaýap berdi. Osy júzdesýden keıin de gazettiń ómirsheńdigine kóz jetkizdim. Alash qaıratkeri A.Baıtursynuly aıtqandaı «Gazet – halyqtyń kózi, qulaǵy hám tili» bolyp qala bermek.
Gúljan TOQMURZINA,
tarıh pániniń muǵalimi
Atyraý oblysy,
Qyzylqoǵa aýdany,
Qarabaý aýyly
