Kezdesý barysynda sóz alǵan Qaraǵandy oblystyq jastar saıasaty máseleleri jónindegi basqarmanyń basshysy Nurjan Jetpisbaev óńirdiń barlyq qalalary men aýdandarynda eriktilerdi qoldaý ortalyqtarynyń ashyla bastaǵanyn habarlady.
– Eriktiler qozǵalysyna barynsha kóp adamdy tartý bizdiń mindetimiz. «Asyl mura» jobasy aıasynda eriktiler tarıhı jáne mádenı eskertkishterdi qalpyna keltirýge kómektesetin bolady. Taǵy bir aýqymdy joba – «Meıirim» jobasy. Atalǵan joba balalar úıiniń tárbıelenýshilerine qoǵamdyq ómirge beıimdelýge, bolashaq mamandyqty tańdaý máselesinde kómek kórsetýdi maqsat etedi. Volonterlik uıymdar jaz aılaryna deıin balalardyń aýlalyq alańqaılaryn retke keltirý úshin «SJ» aksııasyn bastaıdy, – dedi oblys jastarynyń jetekshisi.
Sonymen qatar, ol volonterlik jobalardyń jeti baǵyt boıynsha biriktiriletinin jetkizdi. Mysaly, sonyń biri – «Tegin taksı» jobasy. Qazirdiń ózinde atalǵan sharaǵa qatysýǵa birneshe taksopark kelisim bergen eken. Is túıini bylaısha sheshilmek: volonterler shtab quryp, qala boıynsha júrip-turýy qıyn adamdardan ótinishter qabyldaıdy. Iаǵnı, Uly Otan soǵysynyń ardagerleri men tyl eńbekkerleri, jalǵyz basty qart adamdar, sondaı-aq kóp balaly otbasylar taksı kólikterin tegin paıdalana alady.
Kezdesýge kelgen eriktilerdiń jas shamasy da árqıly boldy. Olardyń arasyndaǵy «Kúmis eriktiler» tobyna jatatyn 55 jastan asqan aǵa býyn ókilderi ózderiniń jetistikterimen jáne josparlarymen bólisti.
Mysaly, Temirtaý qalalyq ardagerler keńesiniń tóraǵasy Birlikbaı Ordabaev «Erikti bolý tek jastardyń ǵana isi degen durys emes» degen pikirin ortaǵa saldy.
– Egde jastaǵy adamdar da qoǵamǵa paıda tıgizsem deıdi, olar óz bilimi men tájirıbesimen bólisýge árdaıym daıyn. Mysaly, bizdiń uıym «Shańyraq» volonterlik ortalyǵymen tyǵyz qarym-qatynas ornatqan. Atalǵan ortalyqtyń kómegimen Máskeýge «Kúmis volonterler» forýmyna barý múmkindigi týdy, – dedi ol.
Oblys ákimi Jeńis Qasymbek eriktiliktiń patrıotızmniń joǵary kórinisi ekenin erekshe atap ótti. Osy turǵydan kelgende ol volonterler qozǵalysynyń aıasyn keńeıtip, jańa azamattyq bastamalardy usynýǵa shaqyrdy.
– Memleket basshysy aıtqandaı, eriktiler senbiliktermen jáne bir jolǵy chellendjdermen ǵana shektelmeýi kerek. Altrýızm – ómirlik qaǵıdattardyń biri. Sondyqtan, ıgi isterde naýqanshylyq degen bolmaıdy. Biz bárimiz birigip, ózimizdiń ómirimizdi jaqsartamyz, – dep túıindedi sózin óńir basshysy.
Kezdesýdiń sońynda eriktilerge kómek retinde óńirlik resýrstyq ortalyq ashylyp, sheberlik sabaqtary, trenıngter men oqytý semınarlarynyń uıymdastyrylatyny habarlandy. Mundaı izgi de ıgi is-sharalardyń óz erkimen, júrek qalaýymen qoǵamǵa qaıtsem paıdamdy tıgizem dep júrgen jomart júrekti jandarǵa myqty qoldaý bolatyny sózsiz.
Qaraǵandy oblysy
