Ustaz bolý mindetti túrde shákirtti oqytý emes. Talantty tap basyp taný, qarlyǵashtyń qanatymen sý sepkendeı bolsa da qamqorlyq kórsetý de ustazdyqtyń belgisi bolsa kerek. Asylhan Shúńirekov degende, kóz aldymyzǵa syrbaz, salıqaly, dombyrany janyna serik etken sal-seriniń keıpi elesteıdi. О́zi týraly kóp aıta bermeıtin, jarnamaǵa joq azamattyń talantty tuńǵysh tanyǵan tulǵa ekeni shyn. Muny bári aıtyp ta júr. Shyn talant ózi-aq jaryp shyǵady, biraq janashyrlyqtyń, aǵalyq iltıpattyń, ári-beriden soń bala bolsa da onyń talantyna degen qurmettiń ózi adamdyq pen adaldyqtyń kórinisi.
Árıne, Meırambektiń atyn qalyptastyrýda, halyqqa tanytýda Altynbek Qorazbaevtyń eńbegi erekshe. Biraq odan buryn Asylhan Shúńirekovtiń de aǵalyq qamqorlyǵyn aıtpaı ketýge bolmaıdy. «1978 jyly aýyldan kelip, Jambyl qalasyndaǵy kásiptik-tehnıkalyq ýchılıshege oqýǵa tústim. 1979 jyly bir azamattar arqyly Meırambektiń ákesi Ábiláshim aǵamyzben tanysyp, aralasa bastadym. Áli esimde, Jambyl qalasyndaǵy Ybyraıym Súleımenov kóshesindegi 144-úıde turatyn. Ákesi Ábiláshim de, anasy Jibek te ónerge jaqyn jandar eken. Meırambek ol kezde kishkentaı bala. Sol kezde ylǵı ónerge jaqyn jandar osy úıde bas qosyp, otyrys jasaıtynbyz. 28 aqpan meniń, al 1 naýryz Ábiláshim aǵanyń týǵan kúni. Bul da biz úshin mereke. Keıinnen Meırambek dombyra úırenip júrdi. Bala kúninen Aıaz Betbaevtyń termelerin, Bákir Tájibaevtyń «Týǵan jer» ánin aıtqanyn kórdim. Bir kúni Jambyl qalasynda úlken aıtys uıymdastyryldy. Qazylar quramynda aqyn Jaqsylyq Sátibekov bastaǵan ylǵı myqtylar eken. Osy kezde talanty endi ashylyp kele jatqan Meırambekti sahnaǵa shyǵaryp, halyqqa tanystyrý kerek boldy. Esebin taýyp, sahnaǵa shyǵardyq. Sonda Aıaz aqynnyń termelerin qara dombyramen naqyshyna keltire shyrqaǵan Meırambekke degen kóptiń yqylasy erekshe boldy. Halyq qol shapalaqtap turyp aldy. Osy kezde aıtysker aqyn Serik Qalıev bala Meırambekti sahnadan kóterip alyp ketti», deıdi Asylhan Shúńirekov.
Adam estelikpen tirlik keshedi. О́tken kúnniń bári estelik. Búginde qazaq án óneriniń bir báıteregine aınalǵan Meırambek Bespaevty alǵash sahnaǵa shyǵaryp, mańdaıynan sıpaǵan azamattardyń qamqorlyǵy eldiń esinde, halyqtyń kóz aldynda. Eshkim óziniń talantyn ózgege bólip bere almaıdy, biraq jaqsylyqqa septesý de sanaly adamnyń isi bolsa kerek. Asylhan Shúńirekovtiń bala Meırambekti Máskeýge ertip barǵanyn, kelgen soń ekeýi aýyl-aýyldy aralap júrip konsert qoıǵanyn kóp el aıtady. «Bir kúni Jambyl oblystyq halyq shyǵarmashylyǵy ortalyǵynyń dırektory Pernebek Ospanov habarlasyp, Máskeýde qazaq óneriniń onkúndigi ótetindigin aıtty. Sol 1987 jyly Manarbek Erjanovtyń stılinde án salatyn ǵajap ánshi Altynbek Orazbekov, men, dástúrli ánshi Qarlyǵash Qojaǵazına jáne Meırambek Bespaev tórteýmiz delegasııa bolyp Máskeýge attandyq. Meırambek mektep oqýshysy bolǵandyqtan anasy Jibek te ilesti. Máskeý sahnasynda Meırambek dombyramen «Týǵan jer» ánin aıtqanda, kórermen tań qaldy. Endi tórtinshi synypta oqıtyn bala ǵoı. Tipti «Moskovskaıa pravda» gazetine Meırambek týraly «Qazaqtyń Robertıno Lorettıi» degen syńaıdaǵy maqala da shyqty. Bul jerde biz Bıbigúl Tólegenova, Álibek Dinishev sııaqty ataqty óner sańlaqtarymen qatar júrdik. Konsert bitken soń, keıinnen «A stýdıo» tobyn qurǵan tanymal ónerpaz Baıǵalı Serkebaev bárimiz elge birge qaıttyq. Bala emes pe, Meırambek jolda Máskeýden alǵan tósbelgisin joǵaltyp alyp, jylaǵanda Baıǵalı oǵan óziniń tósbelgisin berip, jubatqan edi», deıdi Asylhan Shúńirekov.
Máskeýden kelgen boıda bári Moıynqum aýdanyna baryp, konsert qoıady. Sovhozdardy túgel aralap, halyqqa óner kórsetedi. Al konsertten túsken qarajatty olar búkilodaqtyq qaıyrymdylyq qoryna aýdarady. «Talant talantty tanıdy», degen bar. Ata-anasymen aralas-quralas bolyp júrip, bala Meırambektiń boıynda jylt etken ushqynnyń baryn baıqaǵan Asylhan Shúńirekov onyń alǵash sahnaǵa shyǵyp, az da bolsa halyqqa tanylýyna jol ashypty. Keıinnen Áýlıeata jerinde eńbek etip júrgen Altynbek Qorazbaev Almatyǵa aýysyp, bala Meırambekti birjola óziniń tárbıesine alady. Án ónerindegi qanatqaqty oryndaýy Aıaz Betbaevtyń, Bákir Tájibaevtyń ánderinen bastalǵan ol Altynbek Qorazbaevtyń «Boztorǵaı» ánin aıtyp, birte-birte halyqqa tanyldy. Án óneriniń Meırambegi, Meırambek Bespaev bolyp qalyptasty.
Jambyl oblysy
