Qalaı degenmen de adamzat tehnologııany damytyp, belgili bir jetistikterge de jetti. Endi osy tehnologııa koronavırýsqa qarsy turýda adamǵa qandaı kómek kórsete alyp jatyr?
Qytaı bankteri qaǵaz aqshalardy arnaıy óńdeýden ótkizip, dezınfeksııa jasaý tehnologııasyn aýqymdy paıdalanýda. Sonymen qatar elektrondy aqsha aınalymy jóninen basqa elderden áldeqaıda alǵa ketken kórshimiz tek ınternet arqyly ǵana qarjy operasııalaryn iske asyrýǵa kóshken. Osyndaı ádisti Vetnam eli qolǵa alyp otyr. Dúnıejúzilik densaýlyq saqtaý uıymy vırýstyń qaǵaz aqshalardan juǵý yqtımaldyǵy az degenmen de, osyndaı saqtyq sharalary durys júzege asyrylýda.
Koronavırýs oshaǵy bolyp otyrǵan Qytaı blokcheın-tehnologııany aýrýdyń aldyn alý maqsatynda sátti paıdalanyp, dárigerlik onlaın keńes pen skrınıngti osylaı júrgizýde.
Alipay tólem júıesi bolsa, qaıyrymdylyq qoryn baqylaıtyn arnaıy platformasy bar mobıldi qoldanbany iske qosqan. Bul platforma memlekettik organdarmen qoıan-qoltyq epıdemııa profılaktıkasyn júrgizip, qaı jerde qandaı qajettilikter bar ekenin anyqtaıdy, sondaı-aq, materıaldyq jáne qarjylaı qamtamasyz etedi.
Blokcheın negizinde jumys isteıtin qytaılyq Sıan Hý Bao onlaın-platformasy saqtandyrý prınsıpinde kómek kórsete alady. Bul júıege tirkelgen 100 mln adamnyń árqaısysy tek 0,01 ıýan ǵana jarna tólese, aýrýǵa shaldyqqan adamǵa 100 myń ıýan (14 300 AQSh dollary) mólsherinde bir jolǵy qarjylaı kómek kórsetiledi. Bul jerde blokcheın tehnologııasy alaıaqtyqqa jol bermeý úshin qoldanylady.
Dál osy blokcheın dárigerlik qujatty qaǵazdan elektrondy formatqa kóshirip, qujat almasýdy bir jeńildetse, ekinshi jaǵynan qaǵaz arqyly aýrýdyń juǵýyn boldyrmaıdy. Epıdemııa kezinde Blue Cross Insurance mobıldi qoldanbasyn paıdalanyp jatqan qytaılyq dárigerler kóp jumystyń jeńildegenin aıtady.
Tehnologııa zamanynda adam jumysyn jeńildetetin qurylǵynyń biri drondy da qytaılyq mamandar aýrýǵa qarsy kúreste qoldanýda. Termokamera ornatylǵan dron kómegi arqyly adamdar kóp jınalǵan jerde vırýsty anyqtaıtyn jaqsy tásil de óz nátıjesin berýde. Al endi tótenshe jaǵdaı engizilgen eldi mekenderde dron azyq-túlik nemese dári-dármek jetkizý úshin taptyrmas quralǵa aınalǵan.
Kórshi eldegi saýda nemese oıyn-saýyq jaǵyna kelsek, ol epıdemııa taraǵan aımaqtarda tolyǵymen onlaın formatqa ótken deýge bolady. Bilim berý salasy boıynsha da osyndaı jaǵdaıdy kóremiz. Twitter sııaqty alpaýyt kompanııalar koronavırýs taraǵan elderde tek úıde otyryp qana jumys isteýge shaqyrdy.
Sonymen qatar jaqynda ǵana qytaılyq ǵalymdar koronavırýsty basqa ádisterden 10 ese tıimdi anyqtaıtyn tehnologııaǵa qol jetkizgenderin aıtyp, úmit otyn jaqty. Qytaıdyń Hai Kang Life Corporation kompanııasy bul tehnologııany barlyq medısına mekemelerine tegin taratatynyn da málimdedi.
Aınalyp kelgende, "jaman aıtpaı jaqsy joq" demekshi, adamzat úshin kez kelgen qıyn jaǵdaı odan shyǵýdyń jolyn taýyp, jańa tehnologııalardyń damýyna jol ashady deýge ábden negiz bar.
