Qazirgi tańda dúkender men bazar sórelerindegi azyq-túlik baǵasy, onyń ishinde Úkimet bekitken 19 túrli áleýmettik mańyzy bar taýarlar ákimdiktiń tikeleı baqylaýynda. Atalǵan baǵa máselesine baılanysty Aqtaý qalasy ákimdigi aptanyń birinshi jáne tórtinshi kúnderi monıtorıng júrgizedi.
Áleýmenttik mańyzy bar taýarlar qoryn tolyqtyryp, sondaı-aq baǵasyn turaqtandyrý maqsatynda Mańǵystaý oblysynyń azyq-túlik baǵasyn turaqtandyrý qoryna 100 mln teńge bólingen. Onyń 58 mln teńgesine halyqqa qoljetimdi baǵada taýar usynýǵa nıet bildirgen 5 kásipkermen kelisim-shart jasaldy. Aldaǵy aptada 365 tonna kartop,70 tonna jýa, 410 tonna sábiz ben 70 tonna qyryqqabat jetkiziledi.
- Biz Reseı, О́zbekstan elderi men kórshiles oblystardan taýarlar jetkizý týraly turaqty túrde kelissózder júrgizip kelemiz. Áleýmettik mańyzy bar taýarlar qory 2 aıǵa jetedi, dedi «Kaspıı» AQ basqarmasynyń tóraǵasy Abzal Meńdibaev.
Búginde áleýmettik jelilerde, qyzanaq pen qııardyń baǵasynyń kúrt ósýi jaıynda másele kóterildi. Bul kókónis túrleri áleýmettik mańyzy bar azyq-túlik sanatyna kirmeıdi. Alaıda ákimdik tarapynan osyǵan oraı shuǵyl túrde tıisti sharalar qabyldanýda.
Aqtaýǵa qııar men qyzanaqtyń basym bóligi Túrkmenstan elinen tasymaldanady. Álemdegi beleń alǵan koronovırýs ınfeksııasyna baılanysty Túrkmenstan men Iran arasyndaǵy shekara jabylǵan. Túrkimenstanǵa kókónistiń bul túri Irannan keledi eken. Osy jaǵdaıǵa baılanysty tasymaldaý men salyq shyǵyny, árıne taýar baǵasynyń qymbattaýyna tikeleı áser etedi. Kúni keshe Túrkııadan osy qyzanaq pen qııar jetkizildi. Qazirgi tańda halyq eń kóp baratyn «ASAR-S» bazarynda qyzanaq pen qııardyń baǵasy 750-800 teńgege turaqtalǵan, dedi Aqtaý qalalyq kásipkerlik bóliminiń basshysy Baýyrjan Sapa.
