«Koronavırýs ınfeksııasynyń aldyn alý jáne taralýyn eskertý maqsatynda epıdemııaǵa qarsy sharalardy engizý týraly sheshim qabyldanǵan bolatyn. Osyǵan baılanysty Nur-Sultan qalasynda jalpy 1051 tósektik stasıonar ornalastyryldy. Aýrýhanalarda 44 reanımasııalyq tósek pen 173 jasandy tynys aldyrý apparaty bar», - dedi basqarma basshysy qala ákimdiginde ótken onlaın-brıfıngte.
Sáýle Qısyqovanyń sózinshe, «Ramada Plaza» qonaqúı kesheninde (800 orynǵa arnalǵan) jóndeý jumystary aıaqtaldy.
«Búgin kereýet (500 dana) pen tósek-oryn jetkiziledi. Sondaı-aq «Týrıst» jáne «Alaý» qonaqúılerimen kelisimshart jasaý jumystary bastaldy», - dedi S. Qısyqova.
Buǵan deıin Sáýle Qısyqova 20 naýryz kúni koronavırýs ınfeksııasy anyqtalǵan 3 naýqastyń jaı-kúıin aıtyp berdi. Tórt aılyq nárestesi bar otbasy 19 naýryzda Parıj-Mınsk-Nur-Sultan reısinen túsirilip, aýrýhanaǵa jetkizilgen.
