Qaraǵandynyń «Shahter» fýtbol komandasynyń bas jattyqtyrýshysy Vıktor Kýmykov keshe, 24 tamyz kúni Qazaqstan premer-lıgasyndaǵy kezekti týrdan keıin «Sports.kz» portaly tilshisiniń suraqtaryna jaýap berdi. Áńgime kenshiler komandasynyń 28 tamyz kúni Shotlandııanyń ortalyǵy – Glazgo qalasynda jergilikti «Seltıkpen» ótetin Chempıondar lıgasy tórtinshi raýndynyń qarymta matchy tóńireginde órbidi.
-Vıktor Balıýtovıch, Chempıondar lıgasy oıyndarynan keıin komandany Qazaqstan chempıonatyna qaıta beıimdeý qıynǵa soǵa ma?
-Múmkindigi kelgeninshe beıimdeýge tyrysamyz, biraq onyń nátıjesi qandaı – bul endi ózinshe másele. Basymyzda «Seltıkke» qarsy oıyn turǵanda, oıynshylardy mundaǵy oıynǵa qaırap salý óte kúrdeli nárse eken. Jasyratyny joq, jeńisti joldy odan ári de jalǵastyrǵymyz keledi. Qazir bizdiń barlyq aqyl-oıymyz «Seltıkpen» ótetin jaýapty oıynda tur.
-«Ertispen» bolǵan oıynnyń nátıjesine kóńilińiz tola ma?
-Árıne, joq. Biz ony aralas quramnyń ózimen uta alatyn edik. Osyǵan oraı artyq gol da soqtyq. Biraq tóreshi sanamaı tastady. Sońynan beıne jazbany qarap kórip, arbıtrdiń goldy nege sanamaý sebebin taba almadyq. Biz qaıran qalyp otyrmyz.
-Jazǵy transferlik kezeńde quramdy Baqyt Ábýov tolyqtyrdy. Jaǵdaıǵa qaraı birden negizgi quramnan tabyldy. Endi onyń oıynyna baǵa berińizshi.
-Ol ázirge tipti Qazaqstan chempıonatynda oınaýǵa da daıyn emes. Biz tuıyqta qalǵandyqtan, ony alańǵa shyǵarýǵa májbúr bolyp otyrmyz. Ony biz bolashaqta paıdalaný úshin alǵanbyz. Fýtbolshy aldaǵy jattyǵý jıyndarynan ótken soń birtindep qalpyna keledi dep oılaǵanbyz. Alaıda, ony qazirden negizgi quramǵa qosýǵa májbúr boldyq. Jalpy aıtqanda, premer-lıga oıyndaryna ázirge daıyn emes.
-«Skenderbaýdy» jolda qaldyrǵannan keıin siz Eýropa lıgasynda oınaǵannyń tıimdirek bolatynyn aıtqan edińiz. О́z alańyńyzda «Seltıkti» tize búktirgennen keıin bul pikirińiz ózgergen joq pa?
-Shyntýaıtynda bizge qaısy týrnırge qatyssaq ta báribir. Al eger bizdiń Chempıondar lıgasynda oınaýǵa múmkindigimiz bolyp jatsa, odan nege bas tartýymyz kerek? Jankúıerlerimiz, mysaly, Chempıondar lıgasynda oınaǵanymyzdy qalaıdy. Sondyqtan osy maqsatqa jetý úshin qoldan kelgenniń bárin jasaımyz.
-«Shahter» toptyq oıyn qarsańynda jańa oıynshylar ala ala ma?
-Joq, ala almaımyz. Bizdiń qosymsha tapsyrystar naýqanymyz jabylyp qaldy. «Kóktem-kúz» júıesi boıynsha oınaıtyn chempıonattar úshin transferlik tereze jabyldy. Demek, qolda bar oıynshylarmen oınaımyz.
-Komanda Glazgoǵa qandaı kóńil-kúımen attanǵaly otyr? Qarymta oıynnan ne kútýge bolady?
-Bizdiń qoldan kelgeninshe shaıqasyp baǵatynymyz basy ashyq nárse. Shamamyz jetkenniń bárin jasaımyz. Budan basqa eshteńege ýáde bere almaımyn. Keshe Qaraǵandyda «Shahter» fýtbol klýbyna arnalǵan alleıa ashyldy. Osyǵan oraı oblys pen qala basshylyǵyna alǵys aıtqym keledi. Eń bastysy, bizdiń negizgi jankúıerlerimiz – shahterlerdi tól merekelerimen quttyqtaımyn. Olarǵa myqty densaýlyq, otbasylyq ıgilik jáne barlyq jaqsylyqtardy tileımin.
Rýslan Igilik.
RS. Erteń, 26 tamyz kúni túski saǵat 12-de «Shahter» fýtbol komandasynyń quramy Qaraǵandydan Glazgo qalasyna aparatyn charterlik reıspen ushyp shyǵady. Bul saparǵa bizdiń «Egemen Qazaqstan» gazetiniń arnaýly tilshisi de birge baratyn bolyp sheshim qabyldanyp edi, biraq bul merzimge deıin Ulybrıtanııa vızasy alynyp úlgermegendikten, saparǵa daıyndyqty orta joldan úzýge týra kelip otyr. Bul kedergi komandanyń kóptegen jankúıerler armııasyna da qatysty bolyp otyr.
Qarymta match 28 tamyz kúni keshke Glazgonyń 66 000 oryndyq «Seltık Park» stadıonynda ótedi.
Biz «Shahterdiń» namysty qoldan bermeı, ózin jáne komandanyń mıllıondaǵan jankúıerlerin qanaǵattandyratyn nátıjege qol jetkizýin tileımiz.
