Ortalyq kommýnıkasııalar qyzmetinde onlaın brıfıng ótkizgen Aqparat jáne qoǵamdyq damý mınıstri Dáýren Abaev indet tóńiregindegi keıbir máselelerge toqtaldy. Ol Bas sanıtarlyq dárigerdiń halyqtyń qaýipsizdigin qamtamasyz etýge baǵyttalǵan jańa qaýlysyna sáıkes, koronavırýs ınfeksııasy órshigen, qaýipti elderden kelgen azamattardyń barlyǵy 14 kúnge karantınge jatqyzylatynyn jáne vırýsty anyqtaýǵa arnalǵan test tapsyratynyn aıtty. «Buǵan 1 «A» sanatyna kiretin Fransııa, Iran, Ispanııa, Germanııa jáne Italııa syndy elder jatady. Qalǵan elderden kelgen azamattar koronavırýsty anyqtaýǵa arnalǵan saraptamalar tapsyrý úshin stasıonarlyq karantınge 1 kúnge oqshaýlanady. Tipti teris nátıje bolǵannyń ózinde olar 13 táýlikke úıde oqshaýlanatyn bolady», dedi D.Abaev.
Sondaı-aq ol tranzıt arqyly ushyp kelgen azamattar da nazarda bolyp, barlyq saraptamalardy tapsyratynyn jetkizdi. Al Qazaqstan aýmaǵyna tranzıttik reıster qonǵan jaǵdaıda, jolaýshylar ushaq bortynan shyqpaıdy.
Mınıstrdiń málimetinshe, búginde elimizde koronavırýsty anyqtaıtyn 60 myń test bar. «Jaqyn kúnderi bizdiń qolymyzǵa taǵy 150 myń test túsedi. Kelisimshart jasasý kezeńinde tur. Budan bólek 100 myń test demeýshilerdiń qarajaty esebinen satyp alynady. Halyq úshin test tegin júrgiziledi», dedi Dáýren Abaev.
Vedomstvo basshysynyń aıtýynsha, elimiz boıynsha 27 myń tósek-oryn daıyndalǵan. Búginde elordadaǵy tósek-oryndardyń 25, Almatyda 12 paıyzynda ǵana naýqastar jatyr. Al maska óndirý boıynsha da jumys atqarylyp jatqanyn atap ótken D.Abaev: «Qazirgi ýaqytta bir táýliktiń ishinde óndiriletin maskanyń jalpy sany – 604 myń dana. Bul kólem aldaǵy ýaqytta táýligine 1 mln danaǵa jetkiziledi. Nur-Sultan men Almaty qalalarynda táýekel tobyna kiretin adamdarǵa tegin maska berý uıymdastyrylady», dedi.
Mınıstr tótenshe jaǵdaı rejimin buzǵandardyń jaýapqa tartylyp jatqanyn aıtty. «Sanıtarlyq jáne gıgıenalyq normatıvterdi buzý» baby boıynsha sotqa deıingi úsh tergeý bastaldy. Tótenshe jaǵdaı rejimin buzǵany úshin «Ákimshilik quqyq buzýshylyq týraly» kodekstiń 476-baby boıynsha 143 tulǵaǵa qatysty ákimshilik is qozǵaldy. Mysaly, dámhanalar men meıramhanalar ruqsat etilmegen ýaqytta jumys isteıdi. Jıyn-toı ótkizedi. Osynyń barlyǵy adamdardyń ómirine qaýip tóndiredi. Sondyqtan da olar jaýapqa tartylady. Tolyqtaı alǵanda Nur-Sultan men Almatydaǵy blok-beketterdegi jaǵdaı turaqty. Halyq engizilgen sharalarǵa túsinistikpen qaraýda», dedi ol.
6 sáýirden bastap qazaqstandaǵy mektepter qashyqtan oqytýǵa kóshetinin jetkizgen mınıstr «Balapan» telearnasynda qazaq tilinde, «El arnada» orys tilinde qosymsha vıdeo sabaqtar kórsetiletinin aıtty. Sondaı-aq egov.kz elektrondy Ashyq úkimet portalynda jarııalanǵan elimizde koronavırýstyń taralýyn, onyń ishinde qaýipti aımaqtardy kórsetetin kartany halyqtyń jańsaq túsingeni týraly da aıtqan D.Abaev: «Keshe ol dúrbeleń týdyrdy. О́ıtkeni kópshiligi ony vırýstyń taralý kartasy eken dep túsinip qalǵan. Al is júzinde ol jerde negizinen koronavırýspen aýyrǵandarmen baılanysta bolǵan adamdardyń sany kórsetilgen edi. Olardyń barlyǵy da medısınalyq baqylaýdan ótken. Eshqaısysynan koronavırýs ınfeksııasy tabylmaǵan. Dúrligýge esh negiz joq. Túsinikti bolý úshin karta qaıta jetildirilýde», dedi.
Al keshe taǵy onlaın brıfıng ótkizgen Aqparat jáne qoǵamdyq damý mınıstri Prezıdenttiń tikeleı tapsyrmasymen ashylǵan atalǵan shtabtyń úsh baǵyt boıynsha jumys isteıtinin atap ótti. Birinshiden, jalǵan aqparattardy taýyp, teriske shyǵarsa, ekinshiden, ortalyq memlekettik organdardyń aqparattyq jumysyn úılestirip, syn sátte bolǵan jaǵdaılarda birlesip, jedel áreket etedi. Al úshinshiden, jańadan ashylǵan Coronavirus2020.kz saıtynyń jumysyn júrgizedi.
Brıfıngte mınıstr Memleket basshysy daǵdarysqa qarsy óte aýqymdy sharalar týraly baıandaǵanyn jetkizip, muqtaj azamattardyń barlyǵyna memleket kómektesetinin aıtty. «О́zderińiz estigendeı, muqtaj azamattardyń barlyǵyna memleket kómektesedi. Eshkim qamqorlyqsyz qalmaıdy. Prezıdent sóziniń basty túıini osy. Qazir jýrnalıster men azamattardan kelip túsip jatqan suraqtardyń basym kópshiligi Prezıdent Qasym-Jomart Toqaevtyń tapsyrmalarynyń iske asyrylýyna qatysty. Osy rette búgin Premer-Mınıstrdiń tóraǵalyǵymen Úkimettiń otyrysy ótti. Barlyq mınıstrler men ákimder keshegi Prezıdent bergen tapsyrmalardy oryndaý boıynsha jol kartalaryn jasaıdy. Osyǵan oraı barshańyzdan túsinistik tanytyp, Úkimettiń naqty tetikteriniń jarııalanýyn kútýdi suraımyz», dedi ol. Mınıstr Prezıdent tapsyrmalarynyń barlyq pýnktteri oryndalatynyn basa aıtty.
Sondaı-aq ol 500 myń adamǵa azyq-túlik jıyntyǵy beriledi, ıaǵnı bul boıynsha erekshe tártip engizilgen. «Onymen karantın aımaǵynda turatyn jáne ataýly áleýmettik kómek alatyn otbasylardyń 6 jastan 18 jasqa deıingi balalary men eresek músheleri, sonymen qatar 1-toptaǵy barlyq múgedekter qamtamasyz etiledi. Jalpy mundaı kómekpen jarty mıllıonnan astam adam qamtylady», dedi D.Abaev.
Mınıstr tótenshe jaǵdaıdyń engizilýine baılanysty 2019 jyly kóktemde shaqyrylǵan azamattardyń áskerı qyzmetten bosatylmaıtynyn, al áskerge shaqyrý ýaqytsha toqtatylatynyn jetkizdi.
Halyqty otandyq ónimderdi satyp alýǵa shaqyrǵan D.Abaev: «Tamaq, kıim, jıhaz, turmystyq hımııa sııaqty taýarlardy biz ózimiz óndire alamyz. Biraq tek óndirip qoıa salý jetkiliksiz. Ol taýarlar naryqta básekege qabiletti, sapaly jáne qoljetimdi bolýy tıis. Qazaqstanda óndirilgen zatty satyp alyp jatqan árbir azamat bilýi kerek – bul eldiń keleshegine óz úlesin qosýda. Barshańyzdy osyǵan shaqyramyn», dedi.
Aıta keteıik, keshe keshki aqparatqa súıensek, elimizde juqpaly dertti juqtyrǵandardyń sany 68 adamǵa jetip otyr. Atap aıtqanda, Nur-Sultan qalasynda – 35, Almatyda – 29, Qaraǵandyda – 2, Almaty oblysynda – 1, Aqtóbe oblysynda 1 jaǵdaı tirkeldi.
