Rafhat HALELOV
Búgin Oral qalasynda Batys Qazaqstan oblysynyń Bas memlekettik sanıtarlyq dárigeri Muhamǵalı Aryspaev shuǵyl brıfıng ótkizip, óńirde indettiń aldyn alý úshin shekteý sharalary kúsheıtiletinin habarlady.
Atap aıtqanda, tótenshe jaǵdaı kezinde qyzmetine ruqsat etilgen saýda nysandarynyń jumys ýaqyty 09.00-den 21.00-ge deıin shektelip, kelýshilerdiń arasy 1 metrden jaqyndamaý, kezekte 5 adamnan artyq turmaý, tamaq ónimderi qaptalǵan-qoraptalǵan kúıinde bolýy tapsyryldy. Qoǵamdyq tamaqtaný nysandary saǵat 10.00-den 18.00 arasynda ǵana kelýshilerdi qabyldap, onyń sanyn 50 adamnan asyrmaýy, ústelderdiń arasy 2 metrden kem bolmaýy tıis. Al saǵat 18.00-den 22.00-ge deıin tamaqty úıge jetkizýge nemese alyp ketýge ruqsat etiledi. Barlyq jerde sanıtarlyq-dezınfeksııalyq rejım kúsheıtiledi.
Oblystyń bas sanıtarlyq dárigeri Batys Qazaqstan oblysynyń polısııa departamenti, qala jáne aýdandardyń ákimderine naýryzdyń 30-ynan bastap jolaýshy tasymaly qyzmetin shekteýdi tapsyrdy. Iаǵnı emdelýge bara jatqan syrqattardan basqa adamǵa jeke kóligimen, tirkelmegen taksımen oblystar men aýdandar arasynda da jolaýshy tasymaldaýǵa tyıym salyndy. Shekaradan dıplomatııalyq qyzmet personalynan bólek, tranzıttik jáne oblysqa qajetti azyq-túlik taýarlary bar júk kólikteri ǵana dezınfeksııalyq rejımdi qatań saqtap óte alady. Reseı Federasııasyna emdelýge jiberilgen tulǵalardan basqa azamattar Batys Qazaqstan oblysy aýmaǵynan shyǵarylmaıdy. Sondaı-aq Batys Qazaqstan oblysy aýmaǵyna basqa óńir turǵyndaryna kirýge tyıym salynady. Oblys turǵyndary endi emdelýge arnaıy ruqsaty bolmasa, Atyraý jáne Aqtóbe oblystary baǵyty boıynsha jeke kóligimen júre almaıdy.
Shyńǵyrlaý men Aqjaıyq aýdandaryndaǵy sanıtarlyq blok beketterinde jáne Reseı Federasııasymen shekaradaǵy avtoótpelerde sanıtarlyq-karantındik baqylaý kúsheıtiledi.
Qaýly talaptaryn, sondaı-aq tótenshe jaǵdaı rejımin buzǵan tulǵalar tártiptik, ákimshilik jáne qylmystyq jaýapkershilikke tartylady.
Batys Qazaqstan
