Dınara Jeńisbekqyzynyń aıtýynsha, muryn-jutqynshaq – vırýstar men allergenderdiń negizgi kirý qaqpasy. Qaýipti agentterdiń alǵashqy kedergisi bolyp tabylatyn muryn-jutqynshaqtyń silemeıli qabyǵyna erekshe nazar aýdarý qajet. Tynys joldarynyń sozylmaly allergııalyq qabynýy pasıenttiń silemeıli qabyǵyn vırýstarǵa osal etedi. Sondyqtan kóktem mezgilinde, ásirese sáýir aıynyń aıaǵynda, mamyrda, aǵashtar shań basa bastaǵanda, megapolıs turǵyndary saq bolýy kerek.
«Sondyqtan ınfeksııa allergııanyń barysyn, al allergııa vırýs ınfeksııasynyń aǵymyn nasharlatady. Eń qarapaıymy – muryndy, aýyzdy jáne tamaqty tuzdy sýmen shaıý. Bul tańerteń tisti tazalaý sııaqty. Biz tisterimizdi keshke de tazalaımyz, qolymyzdyda kúnine birneshe ret jýamyz, murynnyń silemeıli qabyǵymen de solaı jasaý kerek. Vırýs ınfeksııasy kezinde muryn-jutqynshaqtyń ýaqtyly emdelmegen aýrýlary (sınýsıtter, farıngıt) aýyr asqynýǵa ákelýi múmkin. Allergııasy bar naýqas, ásirese, qazir ósimdikterdiń gúldený kezeńinde aýrýdyń belgileri men aýyrlyǵyn baqylaý úshin dárigerdiń taǵaıyndaǵan terapııasyn qabyldaýy kerek. Vırýstar árdaıym allergııalyq aýrýlardyń, ásirese bronh demikpesi órshýiniń arandatýshysy retinde áreket etedi. Bronh demikpesi bolǵan jaǵdaıda pasıent dáriger taǵaıyndaǵan negizgi qabynýǵa qarsy terapııany alýy kerek, sonymen qatar, vırýstyq-bakterıaldy ınfeksııasynyń qosylý ereksheligin eskere otyryp, emdeýde vırýsqa, bakterııaǵa qarsy, ımmýnomodýlıatorlyq dári-dármekterdi qoldanýǵa bolady» deıdi Dınara Jeńisbekqyzy .
