Mınıstrdiń sózine súıensek, jyl basynan beri koronavırýsqa qarsy kúres úshin memlekettik rezervten aqsha úsh ret bólingen.
- 29 qańtardaǵy birinshi transhpen 1,6 mlrd teńge bólindi. 21 aqpanda koronavırýspen kúresýge qosymsha 428,2 mln teńge bólindi. Úkimettiń rezervinen qarajat úshinshi ret 25 naýryzda bólindi. Somasy 21,4 mlrd teńgeni quraıdy, - dedi ol.
Mınıstr bul qarajattyń dári-dármekterdi, medısınalyq maqsattaǵy buıymdar men zerthanalyq qural-jabdyqtardy, maskalar, qolǵaptar, qorǵanysh kostıýmder men synaq júıelerin satyp alýǵa jumsalǵanyn aıtty.
Eske salsaq, 15 naýryzda pandemııaǵa baılanysty Qazaqstanda tótenshe jaǵdaı engizildi. 19 naýryzdan bastap Almaty men Nur-Sultanǵa karantın engizildi. Qalalarǵa kirýge jáne shyǵýǵa shekteýler qoıyldy, sanıtarlyq jaǵdaı nyǵaıtyldy.
Sonymen qatar, Almatyda aıyrbastaý pýnktteriniń jumysy ýaqytyn shektedi.
Keıin Prezıdent janyndaǵy tótenshe jaǵdaıdy qamtamasyz etý jónindegi memlekettik komıssııa Nur-Sultan jáne Almaty qalalarynda karantın rejımin kúsheıtý týraly sheshim qabyldady. Al 30 naýryzdan bastap Nur-Sultan men Almatyda kásiporyn men uıymdardyń qyzmeti toqtatyldy.
