Memleket basshysy Qasym-Jomart Kemelulynyń halqyna joldaǵan sózi ár adamnyń júrek-jadyna demeý bolarlyq úlken mánge toly boldy. El áleýetin saqtap, árbir azamattyń jaǵdaıyna qamqorlyqpen qaraýdyń múmkindikterin jarııa etti, halyqty abyrjymaı birlikte bolýǵa shaqyrdy, qamsyz qalmaýdyń úkimettik sharalaryn belgiledi. Munyń bári aınalyp kelgende onyń týǵan halqyna degen izgi nıetin, óziniń kómek qolyn sozǵanyn bildirse kerek.
Álemdik deńgeıdi jaılaǵan «tájdi» derttiń zardabyn el kóleminde meılinshe shekteýdiń memlekettik turǵydaǵy taǵy bir sharasy retinde úlken qalalar oqshaýlandy. Kóńili kúpti halyqtyń kóńili bul derttiń qanshalyqty qaýipti ekenin osydan da bilip jatqany sózsiz...
Memleket basshysynyń elge degen qamqorlyqpen jasaǵan mańyzdy málimdemesi el birligin saqtaýǵa, qıyndyqqa moıymaýǵa kúsh-jiger berdi. Elbasy aıtqandaı, arǵy-bergi kezeńderdegi qazaq taǵdyrynda bolǵan el men er synalar aýyrtpalyqtardy qospaǵanda, táýelsizdiktiń alǵashqy jyldaryndaǵy qıynshylyqtarǵa moıymaǵan halqymyz bul synaqtan da aman-esen óteri anyq!
Halyqtyń áleýmettik jaǵynan az qamtylǵan toptaryna, ásirese zeınetkerler men járdemaqy alýshylarǵa ústeme kómek berý úreımen otyrǵan úrkerdeı jurtymyzǵa demeý boldy.
Áleýmettik-rýhanı ómirimizdiń negizin, órkendeýimizdiń ekonomıkalyq tiregin shaıqaltpaı, birligimizdi, tabandylyǵymyzdy asa qajet etetin synaqty kúnderden aman-esen ótýge barshamyz bir kisideı atsalysaıyq, aǵaıyn! El tynyshtyǵyna, eldiń bútindigine múddeli qazaq eliniń árbir sanaly azamaty osyny elin, halqyn súıgen júregimen sezinse eken degen tilegim bar! Bolashaǵymyz baıandy bolǵaı!..
Mádı AIYMBETOV,
jazýshy, «Qurmet» ordeniniń ıegeri
