«Búgingideı shtattan tys jaǵdaıda shet memleketterde júrgen demalýshylarǵa qoldaý kórsetý maqsatynda 2016 jyly Úkimettiń qaýlysymen «Týrıstik Qamqor» qory qurylǵan bolatyn jáne týrıstik qyzmetterdi usyný sharttary árqashan ýákiletti organnyń baqylaýynda. Mine osyndaı keshendi is-sharanyń arqasynda biz elde tótenshe jaǵdaı jarııalanǵan tusta shet elge shyqqan 5 913 týrısti der kezinde uıymdastyrǵan túrde elge qaıtardyq. Onyń 1 823-i josparly túrde qaıtarylsa, 3 748 týrısti arnaıy uıymdastyrylǵan 19 charterlik reıspen ákeldik. Taǵy 342 adamdy sheteldik áýe tasymaldaýshylarymen kelisip, arnaıy baǵyttar arqyly jetkizdik», - dedi mınıstr.
Onyń aıtýynsha, elge jetkizilgen ár týrıst Qazaqstannyń sanıtarlyq qyzmeti bekitken erejelerge sáıkes tekserýden ótti.
«Mysaly, «Týrıstik Qamqor» qorynyń málimetine sáıkes, jyl basynda, dálirek aıtsam 28-qańtar kúngi derekter boıynsha koronavırýs oshaǵy sanalǵan Qytaı Halyq Respýblıkasynyń Haınan aýmaǵynda 1 163 týrıst bolǵan eken. Onyń 958-i – Qazaqstan azamaty, qalǵan 205 adam – elimiz arqyly saıahattaýdy jón sanaǵan basqa memleket azamattary.
Mine, osy 1 163 týrıstiń barlyǵy indet taraǵan aımaqtan túgeldeı elge jetkizildi», - dedi Aqtoty Raıymqulova.
Mınıstrdiń aıtýynsha, dál qazirgi kúni týrıstik qamqorynyń málimetine sáıkes shet elde (Denıs Ryjov esimdi) Almaty qalasynyń bir turǵyny ǵana qaldy. Ol kisi demalyp júrgende ınsýlt alyp, qazir sol sheteldiń aýrýhanasynda em alyp jatyr (Domınıkan Respýblıkasynyń Santo-Domıngo qalasynda).
