Yqylym zamannan kúni búginge deıin jalǵasyp kelgen qazaq halyq ertegileriniń dál qazir qajettiligi tipti kúsheıip, mán-maǵynasy artyp otyrǵandaı. Olaı deıtin sebebimiz, alapat dertten aman qalý úshin jan ushyrǵan adamzat balasy áliptiń artyn baǵyp, bir-birinen alystap, oqshaý otyr. Dál osyndaı syn saǵatta gazetimiz talǵampaz kishkentaı tyńdarmandar úshin «Egemennen – ertegi» jobasyn kópshilik nazaryna usynyp otyr. Mundaǵy maqsat – úıde otyrǵan jas óskinniń kóńilin aýlaý, qýanysh syılaý. Ertegini «Egemen Qazaqstan» gazetiniń YouTube arnasynan kún saıyn tyńdaı alasyzdar. Nur-Sultan qalasy ákimdiginiń «Qýyrshaq» teatrynyń ártisi, Mádenıet salasynyń úzdigi Saltanat Maǵzym ertegilerdi túrlendire oqyp shyqsa, jobany atqarýǵa sýretshi-karıkatýrashy Aıdarbek Ǵazız, gazet tilshileri Aıa О́mirtaı, Janbolat Kenjeǵul atsalysty.
«Ertegi balany meıirimge úndeıdi. Tapqyrlyqqa úıretedi. Elimizdiń bas gazeti «Egemen Qazaqstan» men «Qýyrshaq» teatrynyń birlesken jobasy urpaq úshin basty baılyq. Dál qazirgi qıyn sátti birlese jeńip shyǵatynymyz sózsiz. Mundaı jobalardy qoldaýymyz kerek, az da bolsa úlesimdi qosyp otyrǵanyma qýanyshtymyn», deıdi Nur-Sultan qalasy ákimdigi «Qýyrshaq» teatrynyń ártisi Saltanat Maǵzym.
Kórkemdik estetıkalyq qýatymen birge tárbıelik máni zor bolyp keletin qazaq halyq ertegileri ádebıetimizdiń asyl qazynasy. Turmys-saltymyzdaǵy ómir shyndyǵy ertekshi baıandaǵan áńgimede jańa bir turpatqa ıe bolyp, ǵajaıyp kóriniske aınalyp, kórkemdele túsedi. Qazaq radıosyndaǵy «Erden atanyń ertegileri», «Zámzágúl ájeniń ertegileri», «Keshki ertegiler» degen atpen úzilissiz berilip turatyn izgilikti dástúrdiń jalǵasyndaı bolǵan shaǵyn jobamyzdy kishkentaı tyńdarmandar qýana qabyl alady degen úmittemiz!
