Pandemııanyń saldarynan biz taǵy da óz aýyl sharýashylyǵymyzdy damytýdyń qajettigin túsinip, ashy sabaq aldyq. Osydan keıin memleketimizde agrarlyq salanyń birinshi orynda bolý keregin túsingen shyǵarmyz.
Dana halqymyz «Altyn-kúmis tas eken, arpa-bıdaı as eken» dep beker aıtpasa kerek. Bizdiń elimiz basqa memleketterge táýeldi bolmaı, óz azamattaryn azyq-túlikpen qamtamasyz etýi tıis, bul elimizdiń azyq-túlik qaýipsizdigi bolyp tabylady. Bul úshin agrarlyq jáne bıologııalyq ǵylymdardy damytýǵa, joǵary bilikti kadrlardy daıarlaýǵa qarjy únemdeýdi qoıý kerek.
Bıylǵy egis maýsymyn ótkizýge keletin bolsaq, memleket bul úshin barlyq qajetti sharalardy qolǵa aldy. Endi eń bastysy, bólingen nesıelerdiń osy kómekti qajet etip otyrǵan orta jáne usaq fermerlik sharýashylyqtarǵa jetýi mańyzdy. Bizdiń ýnıversıtet oqytýshylary stýdentterdi qashyqtan oqytý boıynsha jumystyń kóptigine qaramastan, Qazaqstannyń negizgi astyq egetin oblystarynda kóktemgi egis jumystaryn júrgizý boıynsha usynystaryn daıyndaýda. Tuqymdyq materıaldy saraptaýdy aıaqtaımyz. Qazirgi ýaqytta Soltústik oblystardaǵy 24 elıt-tuqym sharýashylyqtarynyń tuqymdary tekserildi. Budan ári osy jyldyń agrotehnologııasynyń erekshelikteri boıynsha fermerler úshin semınarlar men keńester ótkizemiz.
Aıta ketý kerek, bul jumystar úshin bizge eshkim aqy tólemeıdi, oǵan fermerlerdiń artyq qarjysy joq. Bizdiń ǵalymdar muny jaqsy túsinedi. Biraq osyndaı daǵdarys kezinde aldaǵy egin naýqanynda qol qýsyryp otyrýǵa bolmaıdy.
Bıyl egis alqaptarynda ylǵaldyń jetkilikti bolýy da qýantady. Bul jylda astyq mol bolýy kerek. Oǵan qosa memleket tarapynan osyndaı qoldaý kórsetilip otyrǵanda, elimizdiń agrarshylary jaqsy ónim alýy tıis. Olarǵa sáttilik tileımiz!
Aqylbek KÚRIShBAEV,
aýyl sharýashylyǵy ǵylymdarynyń doktory, professor, «S.Seıfýllın atyndaǵy Qazaq agrotehnıkalyq ýnıversıteti» KeAQ basqarma tóraǵasy
