Elbasy Nursultan Nazarbaev 2017 jyldyń sáýir aıynda jarııalanǵan «Bolashaqqa baǵdar: rýhanı jańǵyrý» atty maqalasynda erlerdiń esimin el jadynda saqtaýǵa yqpalyn tıgizip hám serpin beretin máseleni ortaǵa salǵan-dy. Sonda Tuńǵysh Prezıdent: «Ult maqtanyshy bizdiń burynǵy ótken batyr babalarymyz, danagóı bılerimiz ben jyraýlarymyz ǵana bolmaýǵa tıis. Men búgingi zamandastarymyzdyń jetistikteriniń tarıhyna da nazar aýdarýdy usynamyn. Bul ıdeıany «Qazaqstandaǵy 100 jańa esim» jobasy arqyly iske asyrǵan jón. «Qazaqstandaǵy 100 jańa esim» jobasy – Táýelsizdik jyldarynda tabysqa jetken, elimizdiń ár óńirinde turatyn túrli jastaǵy, san alýan etnos ókilderiniń tarıhy» degen bolatyn. Elbasy pármenimen qolǵa alynǵan tyń jobaǵa da mine, bıyl 3 jyl tolyp otyr.
Qoǵamnyń túrli salalarynda jetistikke jetken beımálim tulǵalardyń kóp ekenin baıqap júrmiz. «100 jańa esim» jobasynyń da eń basty maqsaty osyǵan saıady. Iаǵnı, belgisiz esimderdi kópshilikke tanystyrý. О́tken 3 jyl ishinde atalǵan jobaǵa 6000-nan asa ótinim kelip túsken. Atap aıtsaq, 2017 jyly – 2112, 2018 jyly – 2388, 2019 jyly – 1673. Jiberilgen ótinimder ártúrli baǵytta boldy: máselen, jobanyń alǵashqy jylynda sport salasyna qatysty 235, ǵylymmen baılanysty 210, mádenıet pen rýhanııat jaǵynan 307, bıznes salasynyń úzdikterinen 257, medısına turǵysynan 200, qoǵamnyń júırik belsendilerinen 889 ótinish kelip túsken.
Irikteý nátıjesinde jalpyhalyqtyq onlaın daýys berý arqyly 2017 jyly – 102, 2018 jyly – 29, 2019 jyly – 32 – barlyǵy 163 jeńimpaz anyqtalǵan. Bul qazaq halqynyń arasynda erekshe daryn ıeleri kóp ekeniniń aınymas dáleli. «100 jańa esim» jobasymen tanylǵandardyń bári búginde el rýhanııatynyń qaıta jańǵyrýyna súbeli úlesterin qosyp júr.
Atalǵan jobanyń 2018 jylǵy ekinshi kezeńinde kóptiń arasynan oza shaýyp, jeńimpaz atanǵan jas aqyn Maqpal Mysa – jobadaǵy ádebıet salasynan tańdalǵan alǵashqy úzdik edi. Eldegi talantty jastardy iriktep, ózgege úlgi etýdi maqsat etken biregeı jobanyń tańdaýy Maqpal Mysaǵa túsýiniń basty sebebi – jas aqynnyń oqyrman júregine jol tapqan syrly lırıkasynda bolsa kerek. Qasıetti óleń ólkesinde ózgege úlgi bolarlyq sara jol sala bilgen jas aqyn «100 jańa esim» jobasynda jeńiske jetip, Elbasymen dıdarlasý erekshe áser etkenin aıtady.
«100 jańa esim» qatarynda atanǵan soń qatty qýandym. Qýanyshyma qanat bitirgen negizgi sebep, osyndaı iri jobada alǵash ret ádebıet salasynan jeńimpaz shyǵyp otyr. Ádebıetke osylaı kóńil bólingenine qýandym. Elbasymen kezdesýde óz qalaýymdaǵy óleńdi oqydym. «Sen menen alystama» óleńi Elbasyna da, zamandastaryma da unady», dedi «100 jańa esimniń» biri Maqpal Mysa.
