– Men barlyǵy úshin án salmaımyn, men árbir adam úshin án salamyn. Búginde dárigerler men medısına qyzmetkerleriniń jankeshtiligi men tabandylyǵyna tórtkúl dúnıe qaıran qalýda. Búgingi kúnniń batyrlary bul – basqanyń ómiri úshin shybyn janyn shúberekke túıip, kúndiz-túni qyzmet etip júrgen dárigerler. Jer-jerde koronavırýsqa shaldyqqandar sany artýda. Degenmen jazylyp shyqqandardyń sany da az emes. Árıne buǵan aq halatty abzal jandardyń eren eńbeginiń arqasynda qol jetkizip jatyrmyz. «Habar» Agenttigi QR Mádenıet jáne sport mınıstrligi, «Astana Opera» MOBT-men birge dárigerlerge arnap «Búkilálemdik duǵa» atty álemdik tanymal týyndy – grek kompozıtory Vangelıstiń klassıkalyq shyǵarmasyna klıp túsirdi. Buǵan qosa klıpte koronavırýspen kúresip júrgen dúnıejúzi dárigerleri týraly kadrlar da qoldanyldy, – dep atap ótti ataqty ánshi Maıra Muhamedqyzy.
Qazaqstandyqtar «Búkilálemdik duǵa» beınejobasyn erekshe qulshynyspen qabyl alyp, júzdegen tamsanǵan pikirler qaldyrdy, osynaý klıpti óz paraqshalary arqyly kóptep taratty. Olardyń basym kópshiligi barlyq medısına qyzmetkerleriniń tózimdiligi men qaısarlyǵyna bas ıetindikterin aıtty.
