Ártister uly aqyn, oıshyl, aǵartýshy, kompozıtor Abaıdyń álemine úńilý – olar úshin zor qurmet ári qýanysh ekenin atap ótti. Olardyń aıtýynsha, adam karantın jaǵdaıynda, únemi oqshaý keńistikte qalǵan kezde sheksiz de jasampaz shyǵarmashylyq tereńine boılaý – taza aýamen tynystaǵanmen para-par. «Jelsiz túnde jaryq aı» ánin kópshiligi kóz aldymyzǵa ásem sazdyń úılesimdi áýezderinen oryn tapqan aıly tún, buldyraǵan sáýleler tárizdi tylsym tabıǵat beınelerin ákeletin tamasha poezııamen baılanystyrady.
- Abaı ánderi mátini men mýzykasynyń, sózderi men áýenderiniń ajyramas tutastyǵymen erekshelenedi. Abaı Qunanbaev – qazaq halqynyń rýhanı kóshbasshysy, uly aqyn, sazger, fılosof, aǵartýshy ári gýmanıst. Poetıkalyq sózderdiń kúshimen ol adamdardyń oıy men júregine áser etti. «Jelsiz túnde jaryq aı» áni tabıǵat lırıkasyna jatady jáne ulttyq mýzykalyq ónerdiń naǵyz jaýhar qazynasy bolyp tabylady, - dep bólisti Qazaqstannyń eńbek sińirgen ártisi, «Astana Opera» jetekshi solısi Jannat Baqtaı.
Abaıdyń shyǵarmashylyǵy HH-HHI ǵasyrdaǵy kompozıtorlardyń vokaldyq, poezııalyq óneriniń damýyna eleýli áser etti. Osynaý aty ańyzǵa aınalǵan oıshylǵa «Abaı» operasy arnalǵan. Elordalyq teatr repertýarynda ol negizgi orynǵa ıe. 2018 jyly «Astana Opera» shyǵarmashylyq ujymy A.Jubanov, L.Hamıdıdiń «Abaı» operasynyń qoıylymy úshin ádebıet pen óner salasyndaǵy Qazaqstan Respýblıkasynyń Memlekettik syılyǵyn ıelendi.
