Sharada jer qatynastary salasynda sybaılas jemqorlyq týǵyzatyn jaǵdaılardy joıý, sonyń ishinde jer komıssııasy otyrystarynyń ashyqtyǵy jáne Jer resýrstary geoportalyn jetildirý máselesi talqylandy. Sonymen qatar, bıýdjettik mekeme basshylaryn rotasııalaý, ortalyqtandyrylǵan býhgalterııa, aýdandyq ákimdikterde front-ofıstar – servıstik ákimdikter ashý, «OPEN SPACE» qaǵıdaty jáne aýdandardaǵy mektepterde «E-ashana» avtomattandyrylǵan júıesin engizý máseleleri talqylandy.
Osy jıynda baǵynyshty qyzmetkeri sybaılas jemqorlyqqa jol bergen memlekettik organ basshysynyń otstavkaǵa ketý bastamasy týraly aıtyldy.
- Bul ınstıtýt Elbasynyń bastamasymen, Memleket basshysynyń qoldaýymen júzege asyrylyp otyr. Birinshi basshynyń derbes jaýapkershiligi – júıelik sybaılas jemqorlyqty joıýdaǵy tıimdi ádis. Mundaı normanyń engizilýi sybaılas jemqorlyq faktilerin joıýǵa múmkindik berip qoımaı, ony túbirimen joıýǵa kómektesedi. Bul rette Shyńǵyrlaý aýdanynyń eks ákimi Erjan Turmaǵambetovtiń óz erkimen qyzmetten ketkenin atap ótken jón, - deıdi Batys Qazaqstan oblysy boıynsha Sybaılas jemqorlyqqa qarsy qyzmet basshysy Rýstam Aqmyrzaev.
Jańa Zańǵa sáıkes, birinshi basshy onyń tikeleı baǵynyshty tulǵasyna qatysty sottyń aıyptaý úkimi kúshine engennen soń kúntizbelik 10 kún ishinde nemese aqtalmaıtyn negizder boıynsha qylmystyq is toqtatylǵannan keıin otstavkaǵa ketýge mindetti.
Búginde sybaılas jemqorlyqqa qarsy kúres memleket saıasatynyń basym baǵyttarynyń birine aınaldy. Batys Qazaqstan oblysynyń ózinde Agenttik bastamasymen Aqparattyq-aǵartýshylyq shtaby quryldy. «Adal komek» jobasy, «Aqjaıyq – adaldyq alańy» jobasy iske asyrylyp jatyr.
Rýstam Aqmyrzaevtyń aıtýynsha «Antikor ortalygy» servıstik ortalyǵynda jemqorlyqqa qarsy is-qımylǵa baılanysty is-sharalar ótkizý úshin barlyq jaǵdaı jasalǵan. Bul ortalyqta kez-kelgen azamat sybaılas jemqorlyqqa qarsy ártúrli is-shara uıymdasa alady eken.
Batys Qazaqstan
