«Soıýzmýltfılm» kınostýdııasynyń basqarma tóraǵasy Iýlıana Slasheva kompanııa japondyq taraptyń Chebýrashka beınesin paıdalaný quqyǵynan bas tartýdy talap etýge nıetti ekenin aıtypty. Mundaı málimdeme Japonııada Chebýrashka týraly alǵashqy 3D mýltfılm tanystyrylǵannan keıin aıtyldy. Joba avtorlary Chebýrashkany 3D formatynda shyǵarǵan.
«Biz kelisimniń qazirgi nusqasyn jaramsyz dep sanaımyz. Meniń oıymsha, taǵy bir sheshim, memlekettik jáne úkimetaralyq deńgeıge Chebýrashka quqyǵyn qaıtarý máselesin sheshý. Qalaı bolǵanda da, jaqyn arada biz quqyqty qaıtarý máselesin baıypty túrde sheshýge nıettimiz», dedi Slashevanyń sózin keltirgen TASS.
Sońǵy jyldary «Soıýzmýltfılm» mýltfılmderdiń «altyn kolleksııasy» dep atalatyn áıgili fılmderge qatysty aýdıovızýaldy quqyqtardy qaıtarý máselesimen aınalysýda. Stýdııa basshylyǵynyń aıtýynsha, osy ýaqytqa deıin quqyqtardyń 90 paıyzdan astamy qaıtarylǵan. Chebýrashka jazýshy Edýard Ýspenskııdiń «Krokodıl Gena jáne onyń dostary» kitabynda alǵash ret paıda boldy.
Jazýshy 2006 jyly «Poleznaıa ploshad. Nedvıjımost» basylymy tilshisimen kezdesken kezde keıipkeri týraly ıdeıanyń týýyna sebep bolǵan oqıǵa týraly aıtyp bergen. Dostaryna qonaqqa kelgen jazýshy etegi edende oratylyp júrgen shýbany kıip, súrinip-qabynyp júrgen kishkentaı qyzdy kóredi. Qyz bala shýbanyń etegine shalynyp, jeti ret qulasa da ústindegisin sheshpeıdi jáne eshkimniń súıemeldeýinsiz jyǵylǵan jerinen ózi turyp ketedi. Ákesi qyzyna keıip: «Oı, opıat chebýrahnýlas!?» deıdi. Keıin surastyrsa, orys tilinde sırek kezdesetin «chebýrahnýtsıa» sóziniń maǵynasy, qulap qalsa da eki aıaǵymen tik turatyndardy chebýrashqa dep ataǵan.
Edýard Ýspensıdiń ataqty keıipkeri týraly ıdeıa osylaı paıda bolǵan. «Chebýrashka balalar men eresekterdiń naǵyz súıiktisine aınaldy. Ekranda alǵash ret Chebýrashka 1969 jyly «Krokodıl gen» anımasııalyq fılminde paıda boldy. Keıinirek, «Soıýzmýltfılmniń» altyn qory «Chebýrashka» (1971), «Shapoklıak» (1974), «Chebýrashka» mektepke barady (1983) kınolarymen tolyqty.
Chebýrashka Japonııaǵa qalaı satyldy?
2003 jyly Tokıodaǵy halyqaralyq anımasııa jármeńkesinde SP International japon kompanııasy «Soıýzmýltfılmnen» 2023 jylǵa deıin Japonııada Chebýrashka týraly mýltfılmder taratý quqyǵyn aldy.
Chebýrashka Japonııada paıda bolýy naǵyz sensasııa boldy. Keıbir saıasatkerler kommýnıstik úgit-nasıhat dep qabyldap, synnyń astyna alǵan desedi. 2010 jyldyń mamyr aıynda Chebýrashka týraly mýltfılmniń japondyq nusqasy jaryq kórdi. Japon avtorlary keıipkerlerdiń shytyrman oqıǵalary týraly jańa áńgimeler bolsa da, túpnusqa fılmniń formatyn saqtaýǵa tyrysty. Sonymen qatar, 26 úsh mınýttyq epızodtan turatyn «Chebýrashka arere» anımasııalyq serııasy bar.
Aıta ketý kerek, jańa Chebýrashka túrli-tústi syzylǵan anımasııalyq serııaǵa aınaldy. Alǵash ret Japonııada «Chebýrashka jáne krokodıl Gena» mýltfılmi 2001 jyly kórsetilgende 700 myń adam tamashalaǵan. Osydan keıin «Chebýrashka» dep atalatyn resmı saıt paıda boldy. Alaıda, japon anımatorlarynyń keıipkerleri men mazmuny Edýard Ýspenskııdiń túpnusqasynan alystatpaǵan.
2013 jyly Chebýrashka týraly japon qýyrshaq mýltfılmin jasaýshy Makoto Nakamýra Chebı dep atalatyn jańa fılm shyǵardy, avtor túp-nusqadan alystap ketpeı, Chebı týraly el ishindegi áńgimelermen tolyqtyrǵan. Bul fılm Reseıde kórsetildi.
Biraq bul da Japonııanyń anımatorlary men «Soıýzmýltfılm» arasyndaǵy kelispeýshiliktiń tońyn jibite almaǵan sııaqty. Eresekter arasyndaǵy talas-tartystan Chebýrashqa men Chebıdi jaqsy kórip úlgergen eki eldiń balalary zardap shekpese bolǵany.
ALMATY
