1964 jyly týǵan naýqas ústimizdegi jyldyń aqpan aıynda ózin alǵash ret jaısyz sezingen, kóziniń kórý qabileti nasharlap, basy birneshe ret aýyrǵan. Sóıtip osy aıdyń basynda dárigerlik kómekke júgingen. Magnıtti-rezonansty topografııa jasalyp, dıagnoz qoıylǵan.
- Bizdiń tájirıbemizde mundaı alyp anevrızmanyń 2,5 sm kóleminde alǵash ret kezdestirdik. Ýaqytynda qaralmaǵan jaǵdaıda naýqastyń ınsýlt alýy múmkin edi. Anevrızma sezimtal kórý júıkesin qysyp tastaǵan, bul óz kezeginde mıdyń basqa da bólikterine zııanyn tıgize bastaǵan. Nátıjesinde kózdiń kórýi nasharlaı túsken. Eger osylaı jalǵasa berse bul mıdaǵy qan tamyrlary jarylyp, múgedektikke ákelip soǵýy múmkin edi. Bas súıekti ashý qajettiligi joq dep sheshken bolatynbyz, sebebi bul óte qaýipti. Oılana kele endovaskýlıarly ota jasaý qajet degen toqtamǵa keldik. Ota jasaý 4,5 saǵatqa jalǵasty. Naýqastyń qazir jaǵdaıy jaqsy, úıine qaıtarýdy josparlap otyrmyz, deıdi Dýman Myrzabekov.
Eń bastysy ota jasaý kezinde dárigerler zamanaýı joldy tańdaǵan. Nátıjesinde naýqasta otadan keıin tyrtyq qalmady jáne ertesine ózdiginen emin-erkin júrip qozǵalýyna kedergi joq.
Aıta ketý kerek, neırohırýrg Dýman Moldabekuly buǵan deıin Nur-Sultan qalasyndaǵy Ulttyq neırohırýrgııa ortalyǵynda biliktiligin arttyrý maqsatynda jumys jasap, tájirıbei mamandardan tálim alǵan. Sonyń jemisi bolsa kerek, oblystyq aýrýhanada jasalǵan ota sátti aıaqtaldy. Basqarma ókildiginiń aıtýynsha, osyndaı dıagnozy bar naýqastarǵa budan bylaı at terletip basqa óńirlerge barý qajettiligi joq, endi kúrdeli otalar ózimizdiń óńirde de jasala bermek.
Mańǵystaý oblysy
