Negizi aıtýly jarystyń jalaýy Nıý-Delıde jelbireýge tıis edi. Alaıda Úndistan jaǵy AIBA-nyń aldyndaǵy ózderiniń qarjylyq mindettemelerin oryndaı almady. Endi olar 500 myń AQSh dollary kóleminde aıyppul tóleýge tıis.
Bul Belgradtyń tarıhyndaǵy ekinshi álem chempıonaty. 1978 jyldyń 6-20 mamyr aralyǵynda ekinshi álem chempıonaty dál osy qalada ótken bolatyn. Sol kezde jalpy komandalyq esepte Kýba quramasy aldyna jan salmady. Bostandyq aralynyń ókilderi 5 altyn men 3 qolany oljalady. 3 altyn, 1 kúmis jáne 2 qolany ıelengen KSRO quramasy ekinshi orynǵa taban tiredi. Sol komanda sapynda 67 kılo salmaq dárejesinde óner kórsetken almatylyq Valerıı Rachkov altyn tuǵyrǵa kóterildi. Osylaısha, onyń esimi Qazaqstannan shyqqan tuńǵysh álem chempıony retinde tarıhta qaldy.
