Barsha jurtshylyq bolyp asyǵa kútken Memleket basshysynyń búgingi málimdemesin oqı otyryp, osyndaı kúrdeli kezeńdi oıdaǵydaı eńserýdegi jan-jaqty zerdelengen, batyl qadamdardyń «kóz kórip, qol ustaǵan» árbir naqty nátıjesi úshin keýdeńdi zor maqtanysh sezimi kerneıdi.
Qasym-Jomart Kemelulynyń saralanǵan salmaqty sózin Ulttyq mýzeı ujymy ári qýanyshpen, ári ystyq yqylasty qoldaýmen qabyldady.
Birden aıtý kerek, memleketke degen el senimine esh selkeý túsip kórgen emes, qaıta qalyń qaýym bolyp karantınge baılanysty qoıylǵan árbir talapty joǵary jaýapkershilikpen oryndap keledi.
Ejelden kele jatqan: «Apat aıtyp kelmeıdi», degen sóz bar.Kúlli álemdi dúrbeleńge salǵan indet, ókinishke qaraı, muny taǵy bir dáleldep berdi.
Degenmen «qamdanǵan qapy qalmaıdy» degenge súıensek, tájdi tajal álegi Táýelsiz Qazaqstanymyzdyń berik irgesin shaıqalta almady.
Qanshama aýyr soqsa da – egemendiktiń alǵashqy jyldarynan bergi nyq qalyptasqan el basqarý daǵdysy, álemdi tańǵaldyrǵan jan-jaqty jetistikterimiz, bul ekeýine – halqymyzdyń temirdeı tártipke baǵynǵan asyl qasıeti qosylyp: kesirli keseldiń zardaby keń kólemde tamyr jaıa almady.
Tótenshe jaǵdaı kezinde Prezıdent bastamasymen iske qosylǵan qoldaýdyń eki paketi nátıjesinde kóptegen azamattar naqty járdemge qol jetkizdi.
Prezıdent aıtqan: «Qoǵamnyń árbir múshesi memlekettik qamqorlyqtan tys qalmaıdy», degen ýádege kúni búgin qarjylaı kómekke ıe bolǵan 4 mıllıon 250 myń adamnyń árqaısysy kýáger bola alady.
Munyń syrtynda keń baıtaq elimiz boıynsha qanshama aýqymdy qaıyrymdylyq shara atqarylyp jatyr.
Qaderı-halimizshe biz de aıanyp qalmaımyz.
Shuǵylaly shýaqqa mańdaıyńdy tosyp, keń kóshede emin-erkin adymdaıtyn kúnge kóp qalǵan joq.
Bizdiń bárimizdiń birikken kúresimiz sol kúndi jaqyndata túsedi.
Arystanbek MUHAMEDIULY,
Qazaqstan Respýblıkasy Ulttyq mýzeıiniń dırektory
