Buǵan deıin elimizde koronavırýs pandemııasyna baılanysty ishki reıster 100% -ǵa, halyqaralyq reıster 98% -ǵa toqtatylǵan bolatyn. Qazirgi ýaqytta otandyq áýe tasymaldaýshylary aǵymdaǵy jyldyń 1-shi mamyrynan bastap Nur-Sultan jáne Almaty qalalary arasynda ushýǵa daıyn ekendikterin málimdedi. Aldyn ala málimet boıynsha kúnine 4 reıs jasalmaq. Onyń ishinde «Eır Astana» 2 reıs, «Fly Arystan» 1 reıs jáne «SCAT» áýe kompanııasy 1 reıs oryndaıdy.
Taıaýda Azamattyq avıasııa salasynyń ókilderi jyl sońyna deıingi shyǵyn kólemi shamamen 300 mlrd teńgeni quraýy múmkin ekenin málimdep, Eır Astana - 148,4 mlrd teńge, SCAT - 84,6 mlrd teńge, Qazaq Air – 2 mlrd teńge, áýejaılar – 24,5 mlrd teńge, qazaeronavıgasııa – 28 mlrd teńgege shyǵynǵa batýy múmkin ekenin aıtqan edi. Búgingi kúni elimizde Indýstrııa jáne ınfraqurylymdyq damý mınıstri taratqan málimet boıynsha, azamattyq avıasııa salasynda shamamen 20 000 adam jumys isteıdi. Barlyǵynyń jumys oryndary tolyǵymen saqtalyp otyr.
