Sáýir aıynyń ortasynda Eýrokomıssııa basshysy Ýrsýla fon der Lıaıen men Evrokeńestiń tóraǵasy Sharl Mıshel Eýropa Odaǵynyń COVID-19 daǵdarysynan shyǵý jol kartasy aıasynda usyndy. Al týrısterdiń «shengen» vızasyn alýy úshin qosymsha qujat – koronavırýsqa tapsyrylǵan testtiń teris nátıjesi týraly anyqtama qajet bolýy múmkin. Grekııada shekteý 27 sáýirden birtindep alyna bastady. Sertıfıkat alǵan týrıstik nasandar men otelder jumysyn 1 maýsymnan bastaıdy.
Germanııa EO elderi arasyndaǵy shekarasyn jazda ashý múmkindigin talqylaýda. Basqa týrıster úshin Germanııa shamamen qyrkúıek aıyna deıin jabyq.
Jalpy ishki óniminiń 13%-y týrızmge tıesili Italııa shekarasyn sheteldik týrıster úshin 2020 jyldyń sońynda ǵana ashýdy josparlap otyr. Osy oraıda La Repubblica gazeti Italııa mádenıet mınıstri Darıo Francheskınıdiń «Báriniń problemasy ortaq jáne eldiń bári saıahattaǵysy keledi, alaıda bıyl halyqaralyq týrızm úshin jol jabyq» degen sózin jarııalady.
Daily Mail-diń jazýynsha, Sısılııa týrızmdi qalpyna keltirý strategııasyn jasap jatyr, oǵan aımaq bıligi 50 mln eýro bólmek. Arnaıy vaýcherler týrısterge otel qunynyń jartysyn tóleýge jáne mýzeı, arheologııalyq qazba jumystary júrgizilgen jerlerge tegin bılet alýǵa múmkindik beredi. Vaýcherdi Visit Sicily saıtynan alýǵa bolady.
Ispanııada qonaq úılerdiń ashylýy maýsym aıynyń ekinshi jartysyna josparlanǵan. Biraq 2020 jyly olar tek ishki naryqqa jumys isteıtin bolady. Fransııa karantındi 11 mamyrǵa deıin sozdy. El prezıdenti Emmanıýel Makron memleket shekarasy qyrkúıekke deıin jabyq bolatynyn aıtyp jatyr.
Chehııa bıligi 24 sáýirden óz azamattaryna shetelge shyǵýǵa ruqsat berdi, alaıda kelgen kezde mindetti túrde karantınde otyrady. Sonymen qatar, 27 sáýirden JOO, kitaphana, haıýanattar baǵy jáne keıbir dúkender jumysyn qaıta bastady. 11 mamyrdan SOO, mýzeı men shashtarazdar ashylady dep josparlanǵan, al mamyr aıynyń sońyna qaraı meıramhanalar men qonaq úıler óz jumysyn bastaıdy.Ázirge sheteldikterdiń kelýine ruqsat joq. Sáýir aıynyń ortasynda Prague gazeti bul shekteý 2020 jyldyń sońyna deıin óz kúshinde qalady dep habarlady.
Izraıl
Izraıl karantınnen 17 sáýirden kezeń-kezeńimen shyǵa bastady. Dúkender ashylyp, turǵyndardyń kópshiligi jumysqa oraldy. Izraıl týrızm mınıstrliginiń departamenti «Interfaks-Týrızm» portalyna: «Aldymen Izraıl azamattarynyń el ishinde saıahattaýyna múmkindik ashylady. Bul rette uzaq karantın kezinde adamdardyń boıy úırengen qorǵanysh quraldary: qolǵap, maska jáne antıseptıkti únemi paıdalaný talaby qoıylýy múmkin» ekenin aıtypty.
Egıpet
Egıpettiń otelderi eldegi epıdemıologııalyq ahýal qalaı jaqsarady, solaı ashylýǵa daıyn. Alaıda kelýshiler ınfeksııa joq degen anyqtama usynyp, qonaqtar tek oteldiń tórtten bir bóligin ǵana mekendeýi tıis. Bul týraly Sada el-Balad telearnasyna bergen suhbatynda Qyzyl teńiz provınsııasynyń gýbernatory Ámir Hanafı málimdedi. Mysyr otelerleri sheteldikterdi qabyldaý qyrkúıek aıynda qalpyna keledi dep paıymdaıdy. Kompas týroperatorynyń bas dırektory Anna Soloveva Mysyr baǵytyndaǵy týrlar maýsymnyń sońynan jandana bastaıdy degen pikirde.
Maldıv araldary
Maldıv týrızm basqarmasy eldiń 27 kýrorty týrıst qabyldaýdy bastaǵanyn habarlaıdy, alaıda ondaǵy qonaqtardyń qatary sırek. Qalǵan kýrorttar renovasııaǵa jabylǵan nemese qyzmetin toqtatqan.
Kıpr
Týrızm mınıstriniń orynbasary Savvas Perdıostyń aıtýynsha, Kıpr shildeden bastap sheteldik týrısterdi qabyldaýdan úmitti. Týrızm mınıstrliginiń esebi boıynsha, bıyl elge shamamen 1,5 mln sheteldik kelýi múmkin, bul kórsetkish 2019 jylmen salystyrǵanda, 60%-ǵa az.
Qytaı
Qytaı naýryz aıynyń sońynda-aq ishki týrızmdi jandandyra bastady. Turaqty halyqaralyq áýe qatynasyn qaıta jańǵyrtý týraly resmı aqparat ázirge joq. Alaıda «Kompas» týroperatory Qytaı baǵytyndaǵy charterlik baǵdarlamany tamyz aıyna taman qosýdy josparlap otyr.
Taıland
Taıland bıligi karantınde týrıstik nysandar: otel, meıramhana, SPA, dúken men kólikti sertıfıkattaýdy qolǵa alǵan. Taıland týrızm basqarmasy bul joba týrıstik salaǵa degen senimdi kúsheıtip, daǵdarystyń áleýmettik-ekonomıkalyq saldaryn jumsartýǵa múmkindik beredi dep tujyrymdaıdy. Elde eń aldymen ishki týrızm iske qosylady. Máselen, Phýket 1 mamyrdan ashylady dep josparlanǵan. Thai Lion Air jáne Thai Air Asia áýe kompanııalary ishki reısterge osy kúnnen bron ashqan. Týrızm basqarmasynyń deregi boıynsha, 2020 jyly sheteldik týrısterdiń sany 24 mıllıonǵa deıin tómendeıdi.
Túrkııa
Túrkııa ishki týrızmdi 1 mamyrdan, al sheteldik týrısterdi qabyldaýdy mamyrdyń aıaǵynan qabyldaýdan úmitti. Túrkııa Mádenıet jáne týrızm mınıstri Mehmet Ersoıdyń aıtýynsha, sheteldik týrıst aǵynyn qalpyna keltirý Azııa naryǵynan bastalady. Qazaqstan, Reseı, Ulybrıtanııa, Afrıka jáne Taıaý Shyǵys elderiniń týrısteri Túrkııaǵa shilde aıynyń ortasynan nemese tamyz aıynyń sońyna qaraı bara alady. Túrkııanyń áýe kompanııalary Qazaqstanǵa qatysty shekteý sharalaryn barynsha jumsartýǵa úmittenip otyr. Turkish Airlines áýe kompanııasynyń saıtynan Almatydan Stambulǵa 16 mamyrdan 373,2 dollarǵa bılet brondaýǵa bolady.
Qazaqstan
Qazaqstanda karantın 11 mamyrǵa deıin uzartyldy, dese de karantın rejımi aqyryndap jeńildetilip jatyr, 1 mamyrdan Nur-Sultan men Almaty arasynda áýe reısi ashylady.
Sarapshylardyń boljamy boıynsha, eger Úkimet TJ rejımin alyp tastasa, ishki týrızm maýsym aıynan jandana bastaıdy. Týrfırmalar jazdyń birinshi aıynda saıahatshylar úshin birqatar usynys daıyndap otyr: Alakól, Býrabaı, oǵan qosa demalys kúngi tanymdyq jáne ekologııalyq týrlar. Eger halyqaralyq áýe qatynasy qalpyna keltirilse, maýsym aıynyń sońyna qaraı qazaqstandyq týrıster Shyǵys Eýropa elderine: Bolgarııa, Grekııa, Chernogorııa, Horvatııa, múmkin tipti Egıpet men BAÁ-ge bara alady.
