«Astana Opera» ártisteri «Mereke bıdi» onlaın oryndady

- Biz túrli týyndylardy alǵash ret onlaın oryndap turǵan joqpyz. Karantın kezinde osyndaı kúrdeli qashyqtan jumys jasaý barysynda belgili bir tájirıbe jınaqtadyq. Alda kele jatqan merekeler qarsańynda barlyǵynyń kóńil-kúıin kóterip, kórermender aýdıtorııasyn jınap, biriktirgim keldi, sondyqtan qymbatty tyńdarmandarymyz úshin M.Tólebaevtyń «Birjan – Sara» operasynan «Mereke bıdi» tańdadyq. Operadaǵy bul bı hordyń qatysýymen oryndalady, munda hor mańyzdy ról atqarady, ony tutas bı spektakli dep ataýǵa bolady, sondyqtan ulttyq klassıka jaýharymen tanys emes jandarǵa osy operadaǵy janrlardyń keremet úılesimin tyńdap, tamashalaýǵa ári baǵalaýǵa keńes beremin. Orkestrdiń barlyq mýzykanttary osy úzindini oryndaý týraly usynysty qýana qabyl aldy, sebebi ol shyn máninde shabyttandyryp, merekelik kóńil-kúı syılaıdy, - dep atap ótti dırıjer, Qazaqstannyń eńbek sińirgen qaıratkeri Abzal Muhıtdın.   

Oryndaý úshin aty ańyzǵa aınalǵan operanyń atalmysh kompozısııasyn tańdaýdyń ózindik máni bar. Sebebi M.Tólebaevtyń «Birjan – Sara» operasymen 2013 jyly «Astana Opera» teatrynyń shymyldyǵy túrilip, dál osy spektaklmen talaı ret teatr maýsymy bastalǵan edi.

Eske salar bolsaq, «Astana Opera» sımfonııalyq orkestri karantın kezeńinde alǵashqylardyń biri bolyp álemniń kóptegen mýzykanttaryna jańa formatta qalaısha jumys jasaýdyń úlgisin kórsetip, J.Bızeniń «Karmen» operasynan onlaın sıýıta jazdy. Jaqynda ǵana aýqymdy jobada «Astana Opera» sımfonııalyq orkestriniń ártisterine Italııa, Meksıka, Japonııa, Qytaı, Rýmynııa, Grýzııa elderinen álemdik deńgeıdegi opera juldyzdary qosylyp, mıllıondaǵan tyńdarmannyń súıikti «O sole mio» neopolıtandyq ánin oryndady.