Jaqsylyq jasaý – júrektiń isi

Erikti bolý ermek te, erlik te emes. Qysylǵanǵa qolushyn sozý qashannan qanymyzǵa tán  qasıet. El basyna syn saǵat tóngende eriktiler de qarap qalǵan joq. Volonterlik jaı ǵana ur­da-jyq uran emes, shyn kóńildiń, rııa­syz yqylastyń isi ekenin kórsetti. Bas­qa-basqa tikeleı óz ómirine qater tón­­diretin qaýipten qaımyqpaı, qoǵam­dyq qyzmetke erik-jigerimen etene ún qosqan almatylyqtardy kórip, kóńilimiz qýanady. Karantın jarııalanǵan al­ǵash­qy kúni-aq 500-ge jýyq azamat Al­matydaǵy tártipti qamtamasyz etýge ju­myldyrylǵan arnaýly mamandarǵa jár­demge keldi. Keıinnen indet osha­ǵynyń irgesi keńeıip ketpes úshin qala bıligi olardyń basym bóligin úıde bolýǵa úgittegende de, júzge jýyq volon­ter bar­lyq talaptardy saqtaı otyryp, bas­taǵan isti sońyna deıin jetkizýge ruqsat aldy.

Máselen, karantın kúshine engen naý­ryz aıynyń orta sheninen bastap 18 myń almatylyq volonterlerdiń qatarynda bolýǵa yqylas tanytyp, ótinish bergen. Degenmen, joǵaryda aıtyp ótkenimizdeı, arnaıy daıyndyqtan ótken 100 azamat qana iriktelip, tótenshe jaǵdaı kezinde dárigerler men tártip saqshylaryna kómekke keldi. Olardyń basym bóligi muqtaj jandarǵa azyq-túlik taratý, qaraýshysy joq qamkóńil qarııalardy tamaqtandyrý syndy ıgi isterdiń aınalasyna toptasty. Bastapqy kezde karantınge boı úırete almaı kóshe kezgen jurtty indetten saqtandyrýǵa úgittegen jadynamalar taratýǵa da jaqsy úles qosty.

Elbasy Nursultan Nazarbaevtyń usynysy negizinde  Nur Otan partııasynyń bastamasymen qurylǵan «Birgemiz» qory  halyqtyń áleýmettik turǵydan osal toptaryn qoldaýǵa arnalǵan ke­shendi sharalar legin júzege asyrdy. Máselen, «Almaty Birgemiz» qory asa muqtaj 23 myń 472  almatylyqqa 50 myń teńge kóleminde qarjylaı kómek kórsetken.  Atalǵan qoldaý az qamtylǵan kóp balaly otbasylarǵa, múgedekterge, erekshe qajettiligi bar balalardy tár­bıelep otyrǵandarǵa, eń tómengi nemese bazalyq zeınetaqy alatyndar men tul jetimderge úlestirildi. 

Alty jyldan beri volonterlikti janyna serik etkenderdiń biri jıyrma bes jastaǵy Mádı Ahmetov. Jýrnalıstıka mamandyǵy boıynsha bilim alǵan ol búginde Almaty qalalyq Jas Otan Jastar qanatynyń tóraǵasy.

– Almatyda ótetin kez kelgen aýqym­dy sharadan volonterler tys qalyp jatqan joq. Tótenshe jaǵdaı kezinde de olar jiger kórsetti. Olardy yntymaqqa uıystyratyn bir ǵana kúsh – qoǵamnyń izgilenýi men qaıyrymdylyq. Qala sheńberinde 18 myń otbasyna úlestiriletin azyq-túlik sebetterin taratýǵa bizdiń volonterlerimiz zor úles qosyp jatyr. Senbi, jeksenbi demeı tegin qyzmet kórsetip jatqan olar óz eńbegine eshqandaı aqy tilemeıdi. Volonterlik tarıhta teperish kórgen talaı ultty baýyryna basqan bizdiń halqymyzdyń salt-sanasyna sińgen, burynnan bar qundylyq.  Jáne bul qyzmet jas shektemeıdi. Árbir adam volonter bola alady. Bul adamdy rýhanı bıiktetetin qýatty kúsh, – deıdi Mádı Ahmetov.

Mádı tilge tıek etkendeı, shynynda da volonterlik adamdardy sanatqa bólmeıdi. Sebebi bul – adamgershilik pen parasattylyqtyń aıqyn kórinisi. Myńboıaýly megapolıste muny jan júregimen túısingender az emes. Ásirese el úshin qıyn-qystaý kezeńde qaıyrymdylyq qanat qaqsa, qandaı jaqsy. Qanshama otbasy tabysynan qaǵylyp, talaı jannyń tirshiligi turalap turǵan tusta qarlyǵashtyń qanatymen sý sepkendeı kómekke kelgen jomart júrekti jandardyń jóni bólek. Turmysy tómen otbasylarǵa tirek bolyp, qarjy­laı qoldaý bildirgen, azyq-túlik tolty­rylǵan sebetter men jaqsylyq jáshik­terin jetkizgen kásipkerlerge  jurt dán rıza. El birligi synalar tusta jeke basy­nyń qamyn kúıttemeı, baryn jurt­pen bólisken júzdegen kásipker shama-sharqynyń jetkeninshe jaqsylyq jasaýdan qalys qalǵan joq. Budan ózge jeke­legen uıymdar men ujymdar da kúsh biriktirip, kópshilikke kórkem úlgi kór­setti.

Kez kelgen jaqsylyqqa negizdelgen isti volonterlik dep ataýymyzǵa bolady. Onyń aty men syrtqy kórinisinen góri ishki mazmuny mańyzdy. Muny aıtyp otyrǵanymyz, sońǵy kezderi azamattar arasynda  ózi kómek kórsetken otbasylardy sýretke túsirip jelige jarııalaý úrdisi jappaı beleń alyp ketkendeı kórinedi. Basqalarǵa úlgi kórsetý maqsatynda, bul da durys shyǵar. Degenmen, onsyz da qınalyp-qajyp júr­gen jandardy sýretke túsirip, qara­daı qysyltýdyń qanshalyqty qajeti bar?  Bir jaǵynan bul sol sha­ńyraqta ósip kele jatqan órimdeı ós­kinderdiń qurby-qurdastarynyń aldynda ózderin qolaısyz sezinip, psıhologııasyna keri áserin tıgizýi múmkin ekenin de umytpaǵanymyz jón sekildi. Jasaǵan járdeminiń bodaýyn tek bir jaratýshydan úmit etý asyl dinimizdiń de ózegi emes pe?!. Sondyqtan tanymymyzda bar bul túısiktiń tamyryn baltalaýǵa bolmas. Saýapty  amal jalań naýqanshyldyq pen jalpaq uranǵa aınaldyrýdy súımeıdi. Osynaý syn saǵatta ıektep kelip ıirimine tartqan taǵy bir oı osy bolatyn.

Statıstıkany sóıletsek, búginde álem boıynsha 100 mıllıonǵa jýyq adam «volonterlik» dep atalatyn osynaý izgi ispen aınalysady eken. Bizdiń elimizde de bul dástúr órisin keńeıtip keledi. Jyl basynan beri Almatynyń birneshe jo­ǵary oqý oshaǵynyń qabyrǵasynan  «Volonterler ortalyǵy» ashylǵanyn buǵan deıin súıinshilep jazǵan edik. Qoǵam­nyń izgilenýine qomaqty úles qos­qan  jandardyń qatary artyp, ıgi bas­tama júıeli túrde jalǵasa berse dep ti­leımiz.

ALMATY